Алматыда 6 ақпан күні сағат 11.00-де сирена қосылды, — деп хабарлайды Massaget.kz тілшісі.
Алматы төтенше жағдайлар департаментінің хабарлауынша, бүгін, 6 ақпанда таңертең «Көктем-2025» республикалық командалық-штабтық оқу-жаттығуы аясында қалалық ескерту жүйесіне техникалық тексеру жүргізілген.
Ескерту жүйесін тексеру үшін қаладағы хабарлау жүйесі бойынша техникалық құралдар кешені аз уақытқа қосылған.
«Барлығының назарына!!!» дыбыстық сигналы — қандай да бір қауіп немесе төтенше жағдай кезінде барлық шұғыл хабарламаларды жіберу алдында халықтың назарын аудару үшін жасалатын ескерту сигналы.
«Алматы қаласының дабыл жүйесін техникалық байқаудан өткізу — халықты төтенше жағдайлар туралы ескерту және хабардар ету, құлақтандыру құралдарының дайындығын сақтауға және түрлі табиғи құбылыстардың әсерінен болатын кез келген апаттың немесе жойқын әсердің салдарынан тұрғындарды қорғауға көмектесетін негізгі қауіпсіздік шарасы», — деп хабарлады төтенше жағдайлар департаменті.