Алматы қаласында Жастар саясаты басқармасының бастамасымен хостелдерге кешенді мониторинг жүргізу жұмыстары басталды. Бұл шараның мақсаты — жастардың қауіпсіздігін қамтамасыз ету, қоғамдық тәртіпті сақтау және хостелдердегі санитарлық-гигиеналық талаптардың орындалуын бақылау.
Мониторингке қоғам белсенділері, Полиция департаментінің өкілдері, Төтенше жағдайлар департаменті (ТЖД), Санитарлық-эпидемиологиялық бақылау қызметі (СЭС) және қала жастары белсенді түрде қатысуда.
«Хостелдер — жастар жиі тоқтайтын орындардың бірі. Сондықтан олардың қауіпсіздігі мен талаптарға сай жұмыс істеуі — қаладағы тұрақтылық пен қоғамның әл-ауқатын қамтамасыз етудің бір бөлігі. Мұндай тексерістер тұрақты түрде жүргізіліп, өзекті мәселелер шешімін табуы қажет», — деді қоғам белсендісі Алдиар Батырбеков.
Мониторинг барысында әртүрлі бағыттағы мәселелер қарастырылуда:
- Хостелдердегі өрт қауіпсіздігі талаптарының сақталуы;
- Санитарлық жағдайлар мен тазалық деңгейі;
- Құжаттардың заңдылығы және тұрғындардың тіркелуі.
Алғашқы тексерістер нәтижесінде бірнеше хостелдерде кемшіліктер анықталып, оларға ескертулер жасалды. Қалалық билік бұл жұмыс жалғасатынын және анықталған мәселелерді жою бойынша нақты шаралар қабылданатынын хабарлады.
Бұл бастама Алматы жастарының қауіпсіздігін нығайту мен олардың өмір сүру сапасын арттыру жолындағы маңызды қадам болмақ.
