Алматыда 10 мыңға жуық адам емхана таңдау құқығын пайдаланды

Қазақстанда жыл сайынғы емханаға тіркеу науқаны аяқталды. Биылғы кампания барысында оңтүстік астанада таңдау құқығын 10 мыңға жуық адам пайдаланды. Бұл туралы Алматы қалалық Денсаулық сақтау басқармасы төрағасы Иран Шәметеков хабарлады.
Дәстүрлі тіркеу науқаны қыркүйектің 15-і мен қарашаның 15-і аралығында өткен болатын. Емхана ауыстыру туралы өтініштер egov.kz электронды үкімет порталы арқылы қабылданды.
«Қазақстандықтар тіркелген емханадан консультативтік-диагностикалық қызметтерге, жоспарлы стационарлық көмекке, салалық мамандардың консультациясына жолдама алып, медициналық көмектің басқа да түрлерін пайдалана алады. Соңғы жылдары тұрғындардың денсаулық мәселесіне немқұрайдылық танытпай, осындай шараларға белсенді қатысатыны қуантады», — деді Иран Шәметеков.
Медициналық сақтандыру қоры Алматы филиалы директоры Тілеухан Әбілдаевтың айтуынша, биылғы тіркеу науқанына бастапқы медициналық-санитарлық көмек көрсететін 86 емхана қатысқан.
«Биыл Алматы қаласы бойынша 73 емхана Қормен жұмыс істейді. Олардың бәрі тіркелген контингентіне қызмет көрсетіп келеді. Биылғы кампанияға жаңадан 13 медицина ұйымы қатысты. Оның тек 3-еуі ғана халықты тиісті мөлшерде тіркеп үлгерген», — деді Тілеухан Әбілдаев.
Естеріңізге сала кетсек, таңдау құқығын пайдаланған азаматтар жаңа емхана қызметіне 2023 жылдың 1-қаңтарынан бастап жүгіне алады. Ал, таңдау жасап үлгермегендер емхананы кампаниядан тыс уақытта да ауыстыра алады. Атап айтқанда, басқа жерге қоныс аударғанда, емхана қайта ұйымдастырылған жағдайда өзге клиникаға тіркелуге болады. Сонымен қатар, әр тұрғынның емхананы жылына бір рет еркін таңдау құқығы да бар.