Алматының ресми тіркелген халқы бүгінде 2 миллион 300 мыңнан асып отыр, — деп хабарлайды Massaget.kz тілшісі Almaty.tv-ға сілтеме жасап.
Қаланың демографиялық өсіміне әсер ететін негізгі факторлардың бірі – туу көрсеткіші. Биылдың алғашқы бес айында табиғи өсім, яғни туғандар мен қайтыс болғандар арасындағы айырма, шамамен 8 мың адам болған.
«Қазір босану саны бойынша белгілі бір тұрақтылық байқалса да, перинаталдық орталықта туу көрсеткішінің артқанын көріп отырмыз. 2024 жылдан бастап туу көрсеткіші жақсы деңгейде. Былтыр 9300 бала дүниеге келген. Бұл перинаталдық орталықтағы ем сапасын арттыру және жаңа технологияларды енгізу бойынша атқарылып жатқан жұмыстардың нәтижесі», – деді қалалық перинаталдық орталықтың ұйымдастыру-әдістемелік жұмыстар жөніндегі орынбасары Салтанат Ерболатова.
Алайда Алматы тек туу есебінен ғана өсіп жатқан жоқ. Қаланың жұмыс, білім және өзге де мүмкіндіктері де халықты тартатын негізгі себептердің бірі. 2025 жылғы қаңтар–мамырда қалаға 15 мыңнан аса адам көшіп келген. Олардың 1235-і шетелден, ал қалған 14 мыңы – Қазақстанның басқа өңірлерінен.
Мүмкіндік пе, мәселе ме?
Сарапшылардың айтуынша, халық санының өсуі – бір жағынан үлкен мүмкіндік болса, екінші жағынан қалаға қосымша жүктеме түсіреді. Егер барлығы тек ірі қалаларға ұмтылатын болса, бұл инфрақұрылымға қысым түсіреді. Сондықтан аймақтарды дамыту, өңірлерде ұстап тұратын және ынталандыратын факторларды күшейту аса маңызды.
«Ауылдар мен шағын қалаларда халықты ұстап тұратын факторлар қажет. Өкінішке қарай, қазір ондай факторлар жоқтың қасы. Бұрын қала құраушы кәсіпорындар халықты сол жерде ұстайтын. Әйтпесе Алматы мен өзге ірі қалалар мұнша жүктемені көтере алмайды», – деді әлеуметтанушы Айжан Шабденова.
Мектептер, үйлер және қала маңы жобалары
Алматының демографиялық өсімі жаңа мектептер мен балабақшалар, жолайрықтар мен медицина инфрақұрылымын жоспарлауға тікелей әсер етеді. Биыл мегаполисте 2 миллион шаршы метр тұрғын үй пайдалануға берілмек. Ал «Келешек мектептері» ұлттық жобасы аясында 21 мектептің құрылысы жүріп жатыр. Соның ішінде он мектебі жыл аяғына дейін ашылады.
Мыңдаған оқушы өз үйінің жанында оқуға мүмкіндік алады. Сонымен қатар, қазір қала маңы аймақтарын дамыту жобалары да іске асырылып жатыр. Бұл – Алматының мүмкіндіктер қаласы болып қала беруіне жасалып жатқан тағы бір қадам.