Алматыға трамвайларды қайтару жоспарланып отыр. Бұл туралы «Алматыбасжоспар» ҒЗИ бас директоры Асхат Садуов мәлімдеді, — деп хабарлайды Massaget.kz тілшісі.
Трамвайлар қай бағытта жүретіні де айтылды.
«Трамвай «Барлықтан» бастап Төле би көшесі бойымен жүреді. Бұрынғы жолында. Оны әуежайға дейін созамыз, осылайша батыс пен шығысты байланыстырамыз. Біздің мақсатымыз — адамдардың 20 минут ішінде жүріп-тұруына мүмкіндік жасау. Бұл — әлемдік тәжірибе және ақылға қонымды шешім», — деді ол.
Қазір жобаның техникалық-экономикалық негіздемесі әзірленіп жатыр.
«EPC+F (жобалау, құрылыс және қаржыландыру) болса, бес жыл ішінде трамвайды іске қоса аламыз. Құрылыс неғұрлым ұзаққа созылса, соғұрлым қымбат болады, сондықтан инвесторларды тарту үнемдеуге мүмкіндік береді», — деді ол.
Айта кетейік, Алматыда трамвайлар 2015 жылы бірқатар апаттан кейін жүрмей қалды.
