Krisha.kz сарапшылары бір жыл ішінде тұрғын үй бағасының өсуі бойынша Қазақстан қалаларының рейтингін жасады, — деп хабарлайды Tengrinews.kz тілшісі.
Тізімінің басына Ақтау шықты, онда қайталама нарықтағы үйлер 41 пайызға қымбаттаған. Бір жыл бұрын 7-8 миллионға сатып алуға болатын пәтер қазір 11 миллионға жетіп отыр.
Екінші және үшінші орында — Ақтөбе (+35 пайыз) және Қызылорда (+34 пайыз). Бір бөлмелі пәтер бір жылда 2-2,5 миллионға қымбаттады.
Алматы рейтингте төртінші орын иеленді (+33,7 пайыз). Бір бөлмелі пәтерлер 17 миллионнан 23 миллионға дейін қымбаттады. Екі бөлмелі — 24 миллионнан 32 миллионға дейін. Үш бөлмелі — 31 миллионнан 41 миллионға дейін.
Нұр-Сұлтан рейтингтің ортасынан орын алды. Бір жыл ішінде елордада баға төрттен бірге өсті. Орташа 1 бөлмелі пәтердің құны 13,5 миллион болған, қазір 17 миллионға жуық.
Екі бөлмелі пәтерлер 20-21 миллионнан 25 миллионға дейін қымбаттады. Үш бөлмелі — 33 миллионнан 36 миллионға дейін.
Петропавл мен Көкшетауда тұрғын үй 15-16 пайызға қымбаттады. Бұл өңірлер бойынша ең төменгі көрсеткіш.
Қаңтардағы баға өзгерісі
Krisha.kz сарапшыларының айтуынша, бағаның өсуі әлі де жалғасады. Соңғы айда елдегі тұрғын үйлер орташа есеппен 3 пайызға қымбаттаған.
Максималды өсім Ақтауда 7,1 пайыз, Шымкент, Павлодар және Ақтөбеде — 3,6 пайыздан 4,5 пайызға дейін.
Ең төменгі өсім — Көкшетау, Қарағанды және Петропавлда (1,4 пайыздан 1,7 пайызға дейін)
