Air Astana авиакомпаниясы Алматыдан Шымкентке белгіленген уақыттан 15 сағатқа кеш ұшқан Fly Arystan рейсінің кешігуіне байланысты жазаланды. Бұл туралы Индустрия және инфрақұрылымдық даму министрлігі Азаматтық авиация комитетінің басшысы Талғат Ластаев мәлім етті, деп хабарлайды Stan.kz ақпарат агенттігі.
Ластаев қазіргі уақытта ОАК Қазақстанның Авиация әкімшілігімен бірлесіп көптеген рейстердің кешігуі мен жолаушылар шағымына байланысты тексерудің жалғасып жатқанын айтты.
«Тергеу барысында 5 маусымда Air Astana компаниялар тобына кіретін Fly Arystan авиатасымалдаушысының Алматы – Шымкент бағыты бойынша КС-7105 рейсі 15 сағат 10 минутқа кешігіп, ұшқаны анықталды.
Ұшуды күту кезінде бұл рейстің жолаушыларына «Әуе кеңістігін пайдалану және авиация қызметі туралы» заңның 86-бабының 1-бөлігінде көзделген қызметтер, атап айтқанда, қонақүйде орналастыру қызметтері дұрыс көрсетілмеген», – деді Ластаев.
Оның айтуынша, бұл үшін 28 шілдеде әуе компаниясына қатысты ӘҚБтК-нің 567-бабының 2-бөлігі бойынша әкімшілік құқық бұзушылық туралы хаттама толтырылып, оған сәйкес әуе компанияға 1000 АЕК 3 млн 63 мың теңге көлемінде айыппұл салынған.
Ластаев бұл Air Astana компаниясының 2022 жылғы үшінші айыппұлы екенін түсіндірді. Ағымдағы жылы рейстің кешігуі кезінде жолаушылардың құқықтарын бұзғаны үшін компания жалпы сомасы 9 млн 189 мың теңгеге әкімшілік жауапкершілікке тартылған.
«Қазіргі уақытта рейстің кешігуі және жолаушылардың құқықтарын бұзу фактілері бойынша тексеру жүргізілуде. Егер құқық бұзушылық фактілері анықталса, тасымалдаушылар қолданыстағы заңнамаға сәйкес жауапкершілікке тартылады», – деп уәде берді Ластаев.
Еске салайық, бұл жағдайларға рейстердің ұзаққа созылуы және жолаушылардың құқықтарының бұзылуы туралы көптеген шағымдары себеп болған. БАҚ пен әлеуметтік желілердегі резонанстан кейін 18 шілдеде Талғат Ластаев әуе компаниясында жедел кеңес өткізді. Кездесу нәтижесінде Air Astana резервті қамтамасыз ету үшін жеке ұшақ бөлді. Ол тек рейс кешігіп қалған жағдайда ғана пайдаланылатын болады.
