Абай облысы бойынша ҚАЖД қауіпсіздігі барынша төмен мекемесінде сотталғандар арасында шахматтан турнир өтті. Жарысқа 20-дан астам сотталғандар қатысты. Іс-шара тәрбиелік ықпал ету, сотталғандардың зияткерлік әлеуетін дамыту, сондай-ақ пайдалы және мазмұнды демалыс мәдениетін қалыптастыру мақсатында ұйымдастырылды.
Жарыс тәрбие бөлімі мен мекеменің психологиялық және әлеуметтік жұмыс тобының қолдауымен өтті. Сотталғандар жоғары белсенділік көрсетіп, логикалық ойлау қабілетін, төзімділігін және стратегиялық шешім қабылдай білуін көрсетті.
— Мұндай іс-шаралар қайта әлеуметтендіру процесінде маңызды мәнге ие. Сотталғандар арасында зияткерлік ойындарды дамыту олардың бос уақытын тиімді ұйымдастыруға, ой-өрісін кеңейтуге және оң мінез-құлқын қалыптастыруға ықпал етеді. Бұл оларды қайта әлеуметтендіру үдерісіне оң әсерін тигізеді, — деп атап өтті психологиялық және әлеуметтік жұмыс тобының бастығы Жарас Асылбеков.
Турнирге «Абай дарыны» дамыту орталығының шахматтан жаттықтырушысы Нұрдәулет Нұрлыбеков төрешілік етті.
— Шахмат күнделікті ойдан алшақтап, шыдамдылық пен қадамдарын есептей білуге көмектеседі. Мұндай турнирлер бізді пайдалы іспен айналысуға және өзімізбен жұмыс істеуге ынталандырады, — деп бөлісті сотталған.
Турнир барысында қатысушылар арасында салауатты жарыс ахуалы қалыптасып, тәртіп пен өзара құрмет нығайды. Шахмат ойыны өзін-өзі бақылау мен психологиялық тұрақтылықты дамытуға ықпал етеді.
Жарыс қорытындысы бойынша үздік қатысушылар анықталды, жеңімпаздар мен жүлдегерлер мекеме әкімшілігімен марапатталды. Ұйымдастырушылар мұндай тәрбиелік және әлеуметтік маңызы бар іс-шаралар тұрақты негізде өткізілетінін атап өтті.
