Абай Құнанбаев – қазақ халқының маңдайына біткен жарық жұлдызы, адамзаттық ой мен руханият биігіне көтерілген кемеңгер. Ол – тек ақын емес, халықтың жан-дүниесіне терең үңілген, әлеуметтік мәселелерді зерделей білген реформатор. Оның шығармашылығы тек көркемдік тұрғысынан емес, мазмұн мен мағына тұрғысынан да дараланады. Абай қазақ қоғамының рухани жағдайын саралап, халықты білімге, еңбекке, адамгершілікке үндеді.
Абайдың поэзиясы – тәрбие мектебі. Ол өлеңдерінде тек сұлулықты жырлап қоймай, әр шумағында терең ой, философиялық тұжырым жатыр. «Ғылым таппай мақтанба», «Интернатта оқып жүр» сияқты өлеңдерінде жас ұрпаққа бағыт-бағдар береді. Ал «Қара сөздері» – оның терең пайымын, ойшылдығын айқын көрсететін ерекше мұра. Бұл шығармаларында Абай адам болмысы, мінез, қоғамдағы әділетсіздік пен білімсіздік туралы ой қозғайды. Ол шындықты жасырмай, ашық айтып, қоғамның дертін шынайы сипатта көрсеткен.
Абайдың ерекшелігі – оның өмірге, адамға, қоғамға деген көзқарасының тереңдігі мен шынайылығы. Ол Батыс пен Шығыс мәдениеттерін үйлестіре білген, орыс әдебиеті мен Еуропа философиясын оқи отырып, қазақ топырағына үйлестіріп жеткізген тұлға. Абай аудармалары – мәдени көпір. Ол Пушкин, Лермонтов, Крылов шығармаларын қазақ тіліне аударып, халыққа құнды ой-пікірлерді жеткізді. Бұл арқылы Абай қазақ оқырманының көкжиегін кеңейтіп, жаңа дүниетаныммен таныстырды.
Абай – рухани ұстаз. Ол әрбір адамды өзін тәрбиелеуге, ішкі кемелдікке жетуге шақырады. Оның өлеңдері мен қара сөздері тек өткен дәуірге емес, қазіргі заманға да айтар сөзі бар, құнын жоғалтпаған рухани қазына. Қоғамда әділеттілік орнасын, адам баласы ізгілік пен білім жолында жүрсін деген арман – Абайдың басты мақсаты болды.
Бүгінгі күнде де Абайдың ойлары – өзекті. Жастарға жол сілтейтін, елдің рухани тірегіне айналған Абай мұрасы – ұлттың алтын қазынасы. Оның даралығы – терең ой мен биік руханиятты тоғыстырған қайталанбас кемеңгер болуында.
Жалағаш аудандық соттың
бас маманы Р.Аккасинов