Банктер салық органдарына қазақстандықтардың шоттары және олардағы ақша қалдықтары туралы ақпаратты беріп отырады. Қаржы министрлігі тиісті ережелерді реттейтін бұйрық жобасын жариялады, — деп хабарлайды Massaget.kz тілшісі.
Құжатта салық органына есеп берудің жаңа үлгісі 2026 жылғы 1 қаңтарда күшіне енетін жаңа Салық кодексі шеңберінде пайда болғаны айтылған. Бұйрық жобасының өзі биыл 29 қыркүйекке дейін талқыланбақ.
Банктер салық органының сұрауы бойынша 10 жұмыс күні ішінде мына деректерді ұсынуға міндетті:
- Белгілі бір адамның банк шоттары бар-жоғы;
- Осы шоттардың нөмірлері;
- Оларда қанша ақша қалғаны және ақша айналымы.
«Бұл тек кірістер мен мүлік туралы декларация тапсыруға міндетті жеке тұлғаларға қатысты. Банктердің алдында мұндай міндет 2018 жылдан бері бар. Бұл жаңа ереже емес», — деп түсіндірді Қаржы министрлігі Tengrinews.kz-ке жауабында.
Бұл не үшін қажет?
Қаржы министрлігі мәліметінше, өзгерістің мақсаты — жалпыға бірдей декларациялау аясында азаматтардың кірістері мен мүлкіне бақылауды күшейту. Салық органдары ірі мәмілелерді қашықтан қадағалап, оларды берілген декларациялармен салыстыра алады. Бұл әдіс әділ салық салып, бюджет кірісін арттыруға және көлеңкелі экономиканы қысқартуға көмектеседі деп жоспарланып отыр.
Еске салайық, бұған дейін Қазақстанда қыркүйектен бастап мобильді аударымдарды тексерудің жаңа ережелері күшіне енетіні хабарланды. Биыл үш ай үшін 1 миллион теңгеден асатын шек енгізіледі.
