Әділет министрі Қанат Мусин бір реттік рақымшылыққа ілігетіндердің тізімі Парламент заң қабылдағаннан кейін белгілі болатынын мәлімдеді. Депутаттар құжатта бұл құқықты кімдер пайдаланатынын нақты көрсетеді, деп хабарлайды Stan.kz ақпарат агенттігі Astana арнасына сілтеме жасап.
Айта кетейік, Президент Қасым-Жомарт Тоқаев Қазақстан халқына Жолдауында қаңтар оқиғасы кезінде ауыр қылмыс жасамаған азаматтарға бір реттік рақымшылық жасау бастамасын көтерген болатын.
“Тізім әлі жоқ. Рақымшылық туралы заңды Парламент қабылдайды. Қандай қылмыс түріне, кімдерге жеңілдік болатыны құжатта көрсетіледі. Осы заң жарияланып, күшіне енгеннен кейін ғана тұлғалар анықталады”, – деп мәлімдеді Қанат Мусин.
Сонымен қатар елде үш жаңа партия тіркеліп жатыр. Одан бөлек 13 партияны тіркеу өтініші қаралып жатыр. Министрдің айтуынша, «Халық дербестігі» партиясы съез өткізіп, өз мүшелерінің тізімін ұсынған. Ал «Намыс» және «Байтақ» партиясы съез өткізу сатысында.
“Бүгінде 3 партия тіркеу рәсімінің бірінші кезеңінен өтті. Қазір болашақ партиялар съезді өткізу және партия активін қалыптастыру сатысында. Қолданыстағы заңға сәйкес, партияны тіркеу үшін оның құрамында кемінде 20 мың партия мүшесі болуы керек. Сонымен қатар еліміздің әр өңірінде кемінде 600 партия мүшесі болуы тиіс”, – деп қосты әділет министрі.
