Ақтауды қанаттылар санатына жататын көбелек пен қызыл қоңыз басты. Жәндкітердің күрт көбеюі тұрғындарды алаңдатып отыр. Өйткені олар жасыл-желекті жеп тастауы мүмкін деп дабыл қақты, деп хабарлайды Stan.kz ақпарат агенттігі КТК арнасына сілтеме жасап.
Алайда биологтар мөлшерден тыс көбейген көбелек пен қанқызының ешкімге зияны жоқ дейді. Жауын-шашын көп түскен кезде мұндай құбылыс болып тұрады екен. Тіпті «Данаида монарх» деп аталатын көбелек көшпелі қанаттылар санатына жатады. Сондықтан қазір олардың бір елден екінші елге миграциялау кезеңі дейді мамандар. Ал қызыл қоңыз ұсақ шіркейлермен қоректену үшін шыққан дейді мамандар.
«Мұның ешқандай зияны жоқ. Қоректенетін асы люцерн, сиреннің шырынымен қоректенеді. Бұл қазіргі уақытта Түркіменстан арқылы Қазақстанға келіп, Қазақстан арқылы Өзбекстанға бара жатқан көбелектердің түрі. Мұның ешқандай зияны жоқ. Жыл құстары сияқты бұлар да миграцияланып отырады. Мұндай миграцияланатын 12 түрлі көбелек болса, соның 4-еуі Қазақстан арқылы өтеді. Ал қызыл қоңыздар жыртқыштар санатына жатады. Олар ұсақ шіркейлер, бит және сымырмен қоректенеді. Ақтауда ұсақ шіркейлер көп. Олар – біздің кішкентай достарымыз», – деді Ш.Есенов атындағы Каспий мемлекеттік технологиялар және инжиниринг университетінің кафедра меңгерушісі Ләтипа Қожамжарова