Шымкентте болған жарылыстан кейін сәби қайтыс болды. Ресми мәліметтер бойынша, сегіз адам зардап шеккен. Бұл туралы Түркістан облысының Денсаулық сақтау басқармасы мәлімдеді, — деп хабарлайды Tengrinews.kz тілшісі.
Жарылыс кезінде перзентханада 189 пациент және 65 қызметкер болған. Дүниеге келгеніне 18 күн болған сәби қайтыс болды. Облыстық денсаулық сақтау басқармасының мәліметінше, мерт болған бала — үшемнің бірі.
«1 нәресте, салмағы 790 грамм, 18 күн өмір сүрді. 8 адам жарақат алып, Шымкенттің ОКА, №1 ҚА, №2 ҚБ медициналық мекемелеріне жатқызылды», — деді облыстық денсаулық сақтау басқармасының баспасөз қызметіндегілер.
Еске салайық, бүгін сағат 12:6-да Шымкенттегі Г. Иляев көшесінде жарылыс болды. Оқиға орнына Шымкент ПД басшылығы, жедел-тергеу тобы мен ТЖД қызметкерлері шықты. Жарылыс болған жерге қала әкімі Мұрат Әйтенов те келді.
