Журналист Жайна Жақсылықова «Хабар» арнасының директоры лауазымына тағайындалды. Бұл туралы Берік Уәли мәлімдеді, — деп хабарлайды Tengrinews.kz тілшісі.
«Бүгіннен бастап Жақсылықова Жайна Сламбекқызы “Хабар” арнасының директоры лауазымына тағайындалды. Жайна журналистиканың өз жауынгері. Көрермен қауым оны сараптамалық бағдарламалардың авторы әрі жүргізушісі ретінде жақсы таниды», — деп жазды ол Facebook-те.
Берік Уәли әріптесін жаңа қызметімен шын жүректен құттықтап, сәттілік тіледі. «Хабардың» дамуына қосар үлесіңіз зор болады деп сенемін!» деді ол.
Жайна Сламбекқызы 1974 жылы 12 қарашада Қызылорда облысы, Қармақшы ауданы, Қуаңдария ауылында дүниеге келген.
Әл-Фараби атындағы Қазақ Ұлттық университетінің журналистика факультетін аяқтаған.
Еңбек жолын университет бітірген 1996 жылы жазда «Хабар» агенттігінде тілші болып бастаған. 2014 жылдың ақпанына дейін комментатор, атқарушы продюсер, тележүргізуші, ақпараттық-сараптамалық бағдарламалар дирекциясының директоры болып жұмыс істеді.
2014 жылдың ақпанынан 2019 жылдың шілдесіне дейін «Астана» телеарнасында «Біздің уақыт» ақпараттық-сараптамалық бағдарламасының авторы әрі жүргізушісі болды.
2019 жылдың тамызынан Apta бағдарламасының жетекшісі және жүргізушісі.
Жайна Сламбекқызы — Қазақстан Журналистер Одағы сыйлығының лауреаты (1999 жыл). Отандық тележурналистиканың дамуына қосқан үлесі үшін ҚР Президенті сыйлығымен марапатталды (2019 жыл), сонымен бірге «Тұмар» ұлттық телевизия сыйлығының иегері (2020 жыл).
