Алматыда коронавирус жұқтырғандарды тіркеу жоғары деңгейде қалуда. Себебі, бір тәулікте 964 расталған жағдай тіркелді. Бұл туралы Алматы қаласының санитариялық-эпидемиологиялық бақылау департаментінде мәлім етті, деп хабарлайды ҚазАқпарат тілшісі.
Алматыда 2021 жылдың басында вакциналанған адамдардың 4,8% — ында иммунитеті әлсіреген, бұл «омикрон» штаммының иммундық кедергіні еңсеру ерекшелігіне қатысты болды. Сондай-ақ, бұрын ауырып сауыққан адамдардың да иммунитеті төмендеді. Мысалы, 2021 жылдың басынан бері 2,1% (3492 адам) қайта жұқтырды.
Алматыда «омикрон» жұқтыратын халықтың ең белсенді тобы – 20-39 жас аралығындағы жастар, олардың көпшілігі вакцинациядан жалтарғандықтан КВИ – мен ауыратындардың жалпы санының 32% құрайды.
Эпидемиологиялық зерттеулердің мәліметтері бойынша, өткен аптада алматылықтардың 94% –ның жұқтырған негізгі жұқтыру орындары сауда объектілері – 34%, қоғамдық көлік – 24%, отбасылар – 21%, базарлар – 9%, туыстық және достық байланыстар-6% болып отыр.
Айта кету керек, Алматыда үй карантинін бұзушылар саны да өсті. Ағымдағы жылдың басынан бастап 7 ақпанға дейін ұйымдар мен объектілерге барғысы келетін «қызыл» статусы бар 171 адам анықталды, ал 2021 жылдың желтоқсан айында небәрі 55 бұзушы болған, бұл ағымдағы жылдың басында үй карантинінің бұзылуы 3 еседен астам өскенін білдіреді. «Қызыл» статусы анықталған барлық 171 тұрғын әкімшілік жауапкершілікке тартылып, өзін-өзі оқшаулау режимін бұзғаны үшін 7 млн.теңгеден астам сомаға 30 АЕК көлемінде айыппұл төледі.
Осыған байланысты Алматы қаласының санитариялық-эпидемиологиялық бақылау департаменті алматылықтарды эпидемияға қарсы шараларды мүлтіксіз сақтауға шақырды.
«Маска режимін, әлеуметтік қашықтықты, қол гигиенасын сақтау, сондай-ақ адамдар көп жиналатын орындарға бармауға тырысу. Сондай-ақ, амбулаторлық емделудегі азаматтарды өзін-өзі оқшаулау режимін бұзбауға және қоғам алдында азаматтық жауапкершілік танытуға шақырамыз.
Алматылықтарға COVID-19-ға қарсы вакцинациядан және вакцинациядан кейін 6 ай өткен соң ревакцинациядан белсенді өту қажеттігі туралы еске саламыз, өйткені, ұжымдық иммунитеттің қалыптасуы ғана шектеулерді кезең-кезеңімен алып тастауға және үйреншікті өмір салтына оралуға мүмкіндік береді», — деп ескертті қалалық санитариялық-эпидемиологиялық бақылау департаментінде.