Батыс Қазақстан облысында карантин шаралары күшейтіледі. Өңірдің бас мемлекеттік санитария дәрігері жаңа қаулы шығарды. Оның толық мәтінін мына жерден оқуға болады. Құжат 2021 жылдың 1 мамырынан бастап күшіне енеді, — деп хабарлайды Tengrinews.kz тілшісі.
Блокбекеттер Орал қаласынан, Ақжайық, Бөрлі, Казталов, Теректі, Шыңғырлау және Бәйтерек аудандарына кіріп-шығатын жерлерде орнатылады. Бұл өңірлер қазір «қызыл» аймақта.
Тұрғындардың 0:00-ден таңғы 6:00-ге дейін көшеде жүруіне тыйым салу да сақталады.
«Егер көрсетілген уақытта көшеге шығу қажет болса: жеке көлігімен дәріханалардан дәрі-дәрмектер мен медициналық мақсаттағы бұйымдарды сатып алу үшін, шұғыл жағдайда медициналық мекемеге бару үшін, сондай-ақ түнгі ауысымда жұмыс істейтін адамдар 109 телефоны арқылы өтінім қалдыруы керек немесе stopcovid.kz сайтына тіркелуі қажет», — делінген құжатта.
Айта кетейік, бір айдан аса уақыт бойы БҚО коронавирус инфекциясының таралуы бойынша «қызыл» аймақта тұр. Жедел штаб отырысында облыс әкімі Ғали Есқалиев жағдай жақсармаса, карантин қатаңдатылатынын айтқан.
БҚО-да блокбекеттер 2020 жылы 31 наурыз бен 1 маусым арасында орнатылған еді.
