Қазақстан Ұлттық банкінің төрағасы Ерболат Досаев пандемиядан кейін қалыпты өмірге оралу жеті жылдан кейін болады деп есептейді. Оның айтуынша, вакцинаны өндіру және тарату біркелкі жүрмей жатыр. Бұл туралы Atameken Business телеарнасының сюжетінде айтылды, — деп хабарлайды Tengrinews.kz тілшісі.
Бүгінде вакцинациялау қарқыны бойынша жетекші ел Израиль болып тұр, онда халықтың шамамен 40 пайызы вакцина салдырды. Келесі — Ұлыбритания. Үшінші орында — АҚШ.
«Халықаралық сарапшылардың болжамы бойынша, вакцинацияның қазіргі қарқынымен әлем халқының 75 пайызын қамту және қалыпты өмірге қайтару үшін жеті жылдан аса уақыт қажет болады. Жаһандық қор нарықтары қаңтарда пандемияның қайта өршуі мен вакцина таратылуының кешігуіне байланысты экономика баяулауы мүмкін деген қорқынышпен төмендеді», — деп мәлімдеді Досаев.
