2026 жылы қазақтың көрнекті ағартушысы, ұлы педагог, жазушы Ыбырай Алтынсариннің туғанына 185 жыл толып отыр. Ұлт болашағын біліммен байланыстырған ұлы тұлғаның өмір жолы мен мол мұрасы бүгінгі ұрпақ үшін де ерекше маңызға ие.
Ыбырай Алтынсарин қазақ даласында білім беру ісінің дамуына зор үлес қосып, халықты оқу-білімге, еңбекқорлыққа және адамгершілікке үндеді. Оның «Кел, балалар, оқылық!» атты өлеңі талай ұрпақты білімге жетелеп, санасына ізгілік дәнін септі. Ағартушының шығармалары қарапайымдылығымен, тәрбиелік мәнімен және терең ойымен құнды.
Ұлы ұстаздың мақсаты тек сауатты ұрпақ тәрбиелеу емес, елінің болашағына жауапкершілікпен қарайтын, адал еңбек ететін, адамгершілікті жоғары қоятын тұлға қалыптастыру болды. Ол білімді қоғам дамуының басты негізі деп танып, қазақ балаларына арналған мектептер ашуға және оқу құралдарын әзірлеуге бар күш-жігерін жұмсады.
Ыбырай Алтынсариннің мұрасы білім беру саласымен ғана шектелмейді. Оның еңбектерінде ана тіліне құрмет, ұлттық құндылықтарды сақтау, ізгілік пен әділдік идеялары кеңінен көрініс тапқан. Бұл қағидалар бүгінгі қоғам үшін де өзектілігін жоғалтқан жоқ. Әсіресе мемлекеттік тілдің мәртебесін арттыру, сауатты сөйлеу мен жазу мәдениетін қалыптастыру, жас ұрпақтың бойына ұлттық рухты сіңіру бағытында ұлы ағартушының еңбектері маңызды бағдар болып қала береді.
Ыбырай Алтынсариннің 185 жылдық мерейтойы – ұлы ұстаздың өнегелі өмірін еске алумен қатар, оның білімге, тілге және адамгершілікке негізделген өсиеттерін жаңғыртуға мүмкіндік беретін маңызды белес. Оның асыл мұрасын дәріптеу, кейінгі ұрпаққа жеткізу және өмірлік қағидаларын күнделікті қызметімізде ұстану – баршамыздың ортақ міндетіміз.
Ұлы ағартушының есімі халық жадында мәңгі сақталып, білім мен ізгілікке бастайтын шамшырақ болып қала береді.
Ақтөбе қаласының әкімшілік құқық
бұзушылықтар жөніндегі
мамандандырылған ауданаралық
сотының сот приставы Р.Тойбазарова
