Жетісу облысында ағзаларды донорлау және трансплантациялау саласын дамыту, трансплантацияға мұқтаж пациенттерге мамандандырылған медициналық көмек көрсетуді үйлестіру және халықтың ақпараттандырылуын арттыру бағытындағы жұмыстар жалғасуда. Бұл ретте пациенттерді уақтылы анықтау, қажетті медициналық көмекке қолжетімділікті қамтамасыз ету және трансплантациядан кейінгі медициналық бақылауды ұйымдастыруға басымдық беріледі.
Қазіргі таңда облыста ағзалар мен тіндерді трансплантациялауға мұқтаж 69 реципиент тіркелген. Олардың 62-сі бүйрек трансплантациясын қажет етеді, оның ішінде үш бала бар. Сонымен қатар бауыр трансплантациясына мұқтаж үш пациент, жүрек трансплантациясын қажет ететін екі адам, өкпе трансплантациясына мұқтаж бір пациент және қасаң қабық трансплантациясын қажет ететін бір бала есепте тұр.
Реципиенттердің басым бөлігі Талдықорған қаласында тіркелген – 34 адам. Панфилов ауданында 14 пациент есепте тұр. Қалған реципиенттер Текелі қаласы мен облыстың өзге аудандарында тұрады. Бұл көрсеткіштер медициналық ұйымдар арасындағы үйлесімді жұмыстың, пациенттерді тұрақты бақылаудың және мамандандырылған медициналық көмекке уақтылы жолдаудың маңыздылығын көрсетеді.
2026 жылдың бірінші жартыжылдығында Жетісу облысының тұрғындарына тоғыз бүйрек трансплантациясы жасалды. Оның сегізі тірі донорлардың ағзаларын пайдалану арқылы, ал біреуі қайтыс болғаннан кейінгі донордан алынған ағзаны трансплантациялау арқылы жүзеге асырылды. Соңғы жағдайда реципиент бала болды.
Трансплантация – пациенттердің өмір сүру сапасын жақсартуға, денсаулығын қалпына келтіруге және күнделікті өмірге қайта бейімделуіне мүмкіндік беретін жоғары технологиялық медициналық көмектің маңызды бағыты. Сондықтан операциядан кейінгі кезеңде мамандандырылған дәрігерлердің тұрақты бақылауы, денсаулық жағдайын бағалау және тағайындалған емді сақтау да ерекше мәнге ие.
Жетісу облысы Денсаулық сақтау басқармасы басшысының орынбасары Алмагүл Кенжеғұлованың айтуынша, донорлық пен трансплантация саласындағы нәтижелі жұмыс медициналық ұйымдардың өзара іс-қимылына, пациенттерге көрсетілетін көмектің сабақтастығына және қоғамның осы мәселеге қатысты хабардарлығына тікелей байланысты.
«Донорлық пен трансплантация – адам өмірін сақтап қалуға және көптеген пациентке жаңа мүмкіндік беруге бағытталған маңызды сала. Біздің басты міндетіміз – трансплантацияға мұқтаж азаматтарды уақтылы анықтап, олардың қажетті медициналық көмек алуына жағдай жасау, сондай-ақ операциядан кейінгі бақылаудың үздіксіздігін қамтамасыз ету. Сонымен қатар халық арасында ағзалардың қайтыс болғаннан кейінгі донорлығы туралы дұрыс ақпарат таратып, азаматтардың саналы шешім қабылдауына мүмкіндік беру маңызды. Бұл бағыттағы жұмыстар медициналық ұйымдармен бірлесіп жүйелі түрде жалғаса береді», – деді Алмагүл Кенжеғұлова.
Өңірде донорлық пен трансплантация мәселелері бойынша ақпараттық-түсіндіру жұмыстарына да көңіл бөлінеді. 2026 жылдың бірінші жартыжылдығында халықтың хабардарлығын арттыруға бағытталған 10 іс-шара өткізілді. Оның ішінде еңбек ұжымдарында алты кездесу, екі дөңгелек үстел ұйымдастырылып, бұқаралық ақпарат құралдары мен әлеуметтік желілер арқылы ақпарат таратылды, сондай-ақ радио арқылы түсіндіру жұмыстары жүргізілді.
Бұдан бөлек, тірі донордан ағза трансплантациялау мәселелерін қарау кезінде заңнама талаптарының сақталуын және донордың шешімі ерікті түрде қабылдануын қамтамасыз етуге ерекше назар аударылады. Есепті кезеңде этикалық комиссия «донор – реципиент» жұптарына қатысты жеті материалды қарады. Әрбір жағдайда қатысушылардың ақпараттандырылған келісімі, медициналық және этикалық талаптардың сақталуы бағаланды.
Алдағы кезеңде реципиенттер туралы мәліметтерді өзектендіру, олардың денсаулық жағдайына тұрақты мониторинг жүргізу, медициналық ұйымдар арасындағы өзара іс-қимылды жетілдіру және халық арасында ақпараттық-түсіндіру жұмыстарын жалғастыру жоспарланып отыр.
