Алматыда газ берілген аумақтардағы жеке үйлер мен моншаларда көмір, ағаш және басқа да қатты әрі сұйық отынды пайдалануға шектеу енгізіледі. Жаңа талап 2026 жылғы 30 желтоқсаннан бастап күшіне енеді. Бұл туралы Baribar.kz хабарлап отыр.
Бұл талап Алматы қаласының атмосфера ауасын қорғау қағидаларының 52-тармағында қарастырылған. Құжатқа сәйкес, газға қосылуға техника мүмкіндігі бар жеке тұрғын үйлерде, моншаларда және көппәтерлі үйлерде үйлерде қатты және сұйық отын пайдалануға болмайды.
Яғни шектеу тек моншаларға ғана емес, газ жүргізілген жеке сектордағы тұрғын үйлерге де қатысты.
Жаңа талаптар жылыту қазандықтарын пайдаланатын кәсіп нысандарына да қолданылады. Мұндай нысандардағы қалдық көздері ластаушы заттарды тазартатын арнайы қондырғылармен жабдықталуға тиіс. Арнайы техника, бензин және дизель генераторлары да белгіленген экология талаптарына сай болуы қажет.
Төтенше жағдай кезінде жылу және энергия жабдықтаудың баламалы көздерін пайдалануға рұқсат беріледі.
Алматыдағы жеке үйлердің газбен қамтылу деңгейі қазір шамамен 99,6 пайыз. Бұл қаладағы жеке үйлердің басым бөлігінде табиғи газға қосылуға техника мүмкіндігі бар екенін көрсетеді.
Осылайша, 2026 жылдың соңынан бастап Алматының газ берілген аумақтарындағы тұрғындар үйлерін жылыту үшін көмір мен басқа да қатты немесе сұйық отын түрлерін пайдалана алмайды.
