Қазақстан Республикасында сот жүйесін жетілдіру бағытында жүргізіліп жатқан реформалардың маңызды бағыттарының бірі – дербес кассациялық соттардың құрылуы. Бұл өзгеріс азаматтардың құқықтары мен заңды мүдделерін қорғаудың тиімділігін арттыруға, сондай-ақ сот тәжірибесінің біркелкілігін қамтамасыз етуге мүмкіндік береді.
Кассациялық сатының басты ерекшелігі – ол соттардың қабылдаған шешімдерінің заң талаптарына сәйкестігін тексереді. Яғни, кассациялық сот дәлелдемелерді қайта бағалауды емес, төменгі сатыдағы соттардың материалдық және процестік құқық нормаларын дұрыс қолданғанын зерделейді.
Әкімшілік құқық бұзушылық туралы істер бойынша заңдылық қағидатының сақталуы ерекше маңызға ие. Себебі мұндай істер бойынша қабылданған сот актілері азаматтардың құқықтары мен бостандықтарына, сондай-ақ заңды тұлғалардың қызметіне тікелей әсер етуі мүмкін. Осыған байланысты кассациялық тәртіпте қайта қарау тетігі заңсыз немесе негізсіз қабылданған сот актілерін түзетуге мүмкіндік береді.
Кассациялық соттардың қызметі құқық қолдану тәжірибесін біріздендіруге, заң талаптарын біркелкі түсіндіруге және соттардың құқықтық ұстанымдарын қалыптастыруға ықпал етеді. Бұл өз кезегінде құқықтық айқындықты қамтамасыз етіп, азаматтардың сот жүйесіне деген сенімін нығайтады.
Сот реформаларының түпкі мақсаты – заң үстемдігін қамтамасыз ету, әділ сот төрелігін жүзеге асыру және әрбір адамның құқықтарын тиімді қорғау. Кассациялық соттардың жұмысы осы міндеттерді орындауда маңызды рөл атқарып, сот төрелігінің сапасын жаңа деңгейге көтеруге бағытталған.
Л.Шаймова , Қызылорда қаласының әкімшілік құқық бұзушылықтар жөніндегі мамандандырылған сотының сот әкімшісі басшысының орынбасары
