Атырау облысы бойынша Қылмыстық-атқару жүйесі департаментіне қарасты №79 мекемесінде орналасқан РМК «Еңбек-Батыс» филиалы мен жеке кәсіпкерлердің қатысуымен жұмыс кеңесі өткізілді. Іс-шараның негізгі мақсаты – мекеме аумағында өндірістік қызметті дамыту, сотталғандарды жұмыспен қамту және кәсіпкерлік субъектілермен өзара тиімді ынтымақтастықты нығайту болды.
Кеңес барысында мекеме әкімшілігі мен кәсіпкерлер тарапынан бірқатар өзекті мәселелер талқыланды. Атап айтқанда, еңбек заңнамасының талаптарын сақтау, жұмыс орындарын көбейту, өндірістік процестерді кеңейту және сотталғандарды екі ауысымда еңбекке тарту мүмкіндіктері қарастырылды.
Сондай-ақ, кәсіпкерлерге мекеме аумағында бизнес жүргізудің артықшылықтары түсіндірілді. Олардың қатарында дайын инфрақұрылым, тұрақты жұмыс күші және мемлекеттік қолдау шаралары бар екені атап өтілді.
Кездесу қорытындысы бойынша тараптар өзара ынтымақтастықты одан әрі дамытуға, жаңа өндіріс орындарын ашуға және сотталғандарды тұрақты жұмыспен қамту үлесін арттыруға бағытталған нақты ұсыныстарын айтты.
Мамандардың пікірінше, мұндай жұмыс кеңестері сотталғандардың әлеуметтік бейімделуіне оң әсерін тигізіп, оларды қоғамға қайта интеграциялаудың тиімді құралы болып табылады. Сонымен қатар, бұл бастама өңірдегі шағын және орта бизнестің дамуына да серпін береді.
