Тіл – тек қарым-қатынас құралы ғана емес, ол ұлттың рухы, мәдениеті мен тарихының айнасы. Қазақстан секілді көпұлтты мемлекетте мемлекеттік тілдің мәртебесін көтеру – қоғамдағы үйлесімділік пен өзара түсіністікті нығайтудың маңызды шарты.
Мемлекеттік тіл барлық азаматтарды ортақ құндылықтар төңірегіне топтастырады. Әртүрлі этнос өкілдерінің бір тілде еркін сөйлесуі олардың арасындағы сенімді арттырып, ортақ мақсаттарға жетуге жол ашады. Бұл өз кезегінде ел ішіндегі тұрақтылық пен татулықтың негізін қалайды.
Сот жүйесінде де мемлекеттік тілдің рөлі ерекше. Сот отырыстарының ашықтығы мен әділдігін қамтамасыз ету үшін іс жүргізу тілі түсінікті әрі қолжетімді болуы тиіс. Құжаттарды дұрыс рәсімдеу, тараптарға ақпаратты нақты жеткізу – сот жұмысының сапасына тікелей әсер етеді.
Мемлекеттік тілдің қолданылуын қамтамасыз ету арқылы заң үстемдігін нығайтуға және азаматтардың құқықтарын қорғауға үлес қосылады. Мемлекеттік тілде жүргізілген іс қағаздары сот процесінің айқындылығын арттырып, барлық қатысушыларға тең мүмкіндік береді.
Қорытындылай келе, мемлекеттік тіл – ел бірлігі мен татулығының кепілі. Оны дамыту мен кеңінен қолдану – әрбір азаматтың, соның ішінде мемлекеттік қызметшілердің маңызды міндеті.
Шымкент қаласының мамандандырылған ауданаралық экономикалық сотының бас маман-сот отырысының хатшысы Жайлауұлы Алмаз
