Сотталған әйелдерге арналған тұлғалық даму тренингі олардың қайта әлеуметтенуіне, өмірлік маңызды дағдыларды дамытуына және психологиялық кедергілерді тиімді еңсеруіне бағытталған. Мұндай бағдарламалар жазасын өтеу кезеңінде жиі кездесетін күйзеліс, үмітсіздік пен алаңдаушылықты жеңуге көмектеседі.
Тренингтің негізгі мақсаты — тек түзету ғана емес, сонымен қатар сотталған әйелдерде қоғамға және еңбекке деген құрметті қалыптастыру, сондай-ақ олардың білімдік және тұлғалық деңгейін арттыру. Осындай бағдарламаларға қатысу олардың қоғамға сәтті оралуына қажетті дағдыларды дамытуға ықпал етеді.
Аталған тренинг 14–23 наурыз аралығында өтетін «Наурызнама» бағдарламасы аясында ұйымдастырылуда. Бұл кезеңде әр күннің өзіндік атауы мен мағынасы бар. Атап айтқанда, 19 наурыз — Жаңару күні болып белгіленген және бұл тренинг дәл осы күнге орай өткізілуде. Бұл күннің мәні — ішкі жаңару, өмірлік құндылықтарды қайта қарастыру және оң өзгерістерге ұмтылу идеясымен үндеседі.
Мақсатты топтың психологиялық ерекшеліктеріне ерекше назар аударылады. Жазасын өтеуші әйелдер көбінесе қорғансыздық сезімін, күйзелісті, болашаққа деген алаңдаушылықты, сондай-ақ эмоционалдық шаршау мен сағынышты бастан кешіреді.
Мұндай тренингтер тек мекемедегі психологиялық ахуалды жақсартып қана қоймай, қатысушыларға өз өмірін қайта ой елегінен өткізуге мүмкіндік береді. Бұл өз кезегінде қайталама құқық бұзушылықтардың алдын алуға және босатылғаннан кейін қоғамға бейімделуді жеңілдетуге ықпал етеді.
