Семей қаласында, Абай облысы аумағындағы минималды қауіпсіздік мекемесінде отбасы құндылықтары мен жауапкершілік тақырыбында тренинг өткізілді. Іс-шараның мақсаты – сотталған азаматтарға отбасының маңыздылығын, әкенің рөлін және жақындарының қолдауы әр адам үшін қаншалықты маңызды екенін түсіндіру.
Тренинг барысында қатысушыларға қазақ халқының отбасылық дәстүрлері мен құндылықтары туралы айтылды. Әсіресе әкенің отбасының тірегі, негізі екендігіне ерекше назар аударылды. Қатысушылар әкенің бала тәрбиесіндегі орны, жауапкершілігі мен отбасы мүшелеріне көрсететін қамқорлығы туралы пікір алмасты.
Кездесу барысында сотталған ер азаматтар өз ойларымен бөлісіп, отбасының адам өміріндегі ең қымбат құндылық екенін атап өтті. Олар үшін отбасының қолдауы қиын кезеңдерде үлкен күш беретінін, адамға өз қателіктерін түсініп, болашаққа дұрыс қадам жасауға мүмкіндік беретінін жеткізді.
Психолог-инспектор Оразбаева Әсемгүл Оралбекқызы өз сөзінде:
«Әрқайсысы мықты әрі бақытты отбасы құруды армандайды. Отбасының қолдауы – әр адам үшін өте маңызды. Әсіресе қиын жағдайға тап болған адамға отбасының жылуы мен сенімі үлкен күш береді», – деп атап өтті.
Бұл тренинг ашық пікір алмасуға мүмкіндік берді. Қатысушылар өздерінің әке және отбасы иесі ретіндегі жауапкершілігі туралы ойланды.
Осындай іс-шаралар сотталған азаматтардың отбасы құндылықтарын терең түсінуіне ықпал етіп, қоғамға қайта оралу жолында жаңа өмір бастауына мотивация береді. Өйткені отбасы – адам өміріндегі ең үлкен тірек пен сенімнің қайнар көзі.
