Қазақстан Республикасының Мемлекеттік кеңесшісі Ерлан Қарин Жаңа Конституция бойынша өтіп жатқан жалпыхалықтық референдумда дауыс берді. Ол өз таңдауын елордадағы Ұлттық академиялық кітапханадағы №129 учаскеде жасады.
– Бүгін маңызды күн. Себебі жарты жылға созылған қоғамдық дискуссияның бүгін нәтижесін шығаратын боламыз. Мемлекет басшысы өткен жылы Парламентте халқына Жолдауында ең алғаш рет бір палаталы парламентке көшу идеясымен бөліскен болатын. Сол уақыттан бері 189 күн қоғамдық дискуссиялар жүрді. Дискуссиялар барысында азаматтардан мыңдаған ұсыныс келіп түсті. Басынан бастап ел азаматтары жоғары ниет білдіріп, қызығушылықпен осы дискуссияға араласқан болатын, – деді Ерлан Қарин.
Сонымен қатар Мемлекеттік кеңесші референдумда осы талқылаулардың нәтижесі айқындалатынын атап өтті. Оның айтуынша, бүгін Қазақстан азаматтары ел болашағына қатысты шешім қабылдайды. Қабылданатын шешімге сәйкес, қандай қоғамда өмір сүретінімізді және қандай құндылықтар негізінде әрі қарай дамитынымызды айқындаймыз. Менің ойымша, бүгін маңызды шешім қабылданады деді ол.
– Бұл – соңғы төрт жылда Мемлекет басшысы кезінде өткен үшінші референдум. Елімізге қатысты маңызды шешімдер жалпы халықтық диалог, референдум арқылы шешілуі керек деген қағидат күнделікті саяси өміріміздің нормасына айналды. Сондықтан бұл жағынан Қазақстан басқа мемлекеттерге де үлгі көрсетіп отыр деп ойлаймын. Осындай сындарлы, жан-жақты диалог құру және қоғамдық-саяси өмірдің жоғары динамикасы тұрғысынан маңызды қадам, – деді Ерлан Қарин.
Мемлекеттік кеңесші бұған дейін Конституциялық комиссияның XII отырысында заңгерлер мен тіл мамандарының бірлескен жұмысының нәтижесінде жаңа Ата заң мәтіні оқуға жеңіл, түсінуге оңай әрі құқықтық тұрғыдан нақты құжатқа айналғанын атап өткен болатын.
Айта кетейік, Қазақстан үлкен саяси өзгерістер қарсаңында тұр. Жалпыхалықтық референдум елдің даму бағытын айқындайтын маңызды қадам ретінде қарастырылып отыр. Осы орайда елорда тұрғындары да өз таңдауын жасап, ел болашағына бейжай қарамайтынын білдірген еді.
Орталық сайлау комиссиясының мәліметінше, дауыс берушілер референдум күні тіркелген жері бойынша учаскеге барып дауыс береді. Ал ешқайда тіркелмеген азаматтарға дауыс беру учаскесіне бір тәулікке тіркелу мүмкіндігі қарастырылған.
Бүгін республика бойынша 10 мыңнан астам дауыс беру учаскесі жұмыс істеп тұр.
