Алматы қаласы ҚХА «Ассамблея Жастары» мүшелері Медеу ауданының комьюнити орталығында өткен диалог алаңында жаңа Конституция жобасы мен алдағы референдумды талқылады.
Ал G-35 студенттік өзін-өзі басқару ұйымының қалалық жетекшісі Каби Елікбайдың айтуынша, іс-шараның мақсаты — жаңа Конституция жобасының мәнін жастарға түсіндіру, азаматтық белсенділікті арттыру және ашық диалог мәдениетін дамыту. Ол мұндай диалог алаңдары арқылы ел болашағына әсер ететін өзгерістерді түсіндіріп, жастар пікірін білу маңызды екенін атап өтті.
Ал Алматы қаласы Қоғамдық кеңесінің мүшесі Рустам Қайрыев жаңа Конституция жобасы заман талабына сай екенін айтты.
- Алдағы референдум алдында біз — Қазақстан халқы Ассамблеясының жастары және G-35 студенттік қауымдастығы — жаңа Конституция жобасын талқылау мақсатында диалог алаңын ұйымдастырдық. Жастарға референдумға шығарылатын жаңа Конституция жобасының жаңашылдықтарды түсіндірдік. Сарапшылардың бағалауынша, соңғы 15 жылда әлемде 3 200-ге жуық саяси реформа жүргізілген. Оның 95%-ы әртүрлі мемлекеттерде оң өзгерістерге әкелген. Жастар арасында бұл реформалардың қажеттілігі туралы сұрақ қойылып жатады.
Шын мәнінде, әрбір конституциялық реформа уақыт талабынан туындайды. Олар жайдан-жай өзгертілмейді. Мысалы, қолданыстағы Конституцияда азаматтардың цифрлық қауіпсіздігі туралы ештеңе айтылмаған. Ал жаңа жобада бұл мәселе көрсетілген, — деді ол.
Кездесу барысында қатысушылар елдің стратегиялық даму бағыттарын, құқықтық өзгерістердің қоғам өміріне әсерін, сондай-ақ жастардың әлеуметтік-саяси процестердегі рөлін талқылады. Диалог алаңы еркін форматта өтеді, бұл қатысушыларға өз ұсыныстарын білдіруге және сарапшыларға тікелей сұрақтар қоюға мүмкіндік берді.
