Ақтөбеліктерге бір қолға төрт килограмнан артық картоп сатылмайды. Әлеуметтік павильондарда шектеулер енгізілді, — деп хабарлайды Massaget.kz тілшісі Tengrinews.kz-ке сілтеме жасап.
Ақтөбеде картоп төңірегінде дүрбелең жалғасып жатыр. Коммуналдық шағын базарларда оны бір қолға 4 килограмнан артық бермей жатыр. Қала тұрғындарының айтуынша, 3 ақпанда әлеуметтік павильонда бір килограмы 116 теңге тұратын картоп болмаған — сөрелер бос болған. Кейінірек картоп келген, бірақ жергілікті тұрғындардың бірінің айтуынша, сатып алушыларға тек бір пакет сатып алуға рұқсат етілді.
«Дүкенде бір адамға төрт килограмм картоп қана береді. Картоппен проблема», — дейді Ақтөбе қаласының тұрғыны.
Әлеуметтік желілерде Ақтөбе супермаркеттерінің бірінде картоп арзан бағамен сатылып жатқаны жайлы видео пайда болды. Алайда оның сапасы сатып алушылардың көңілінен шықпады: көптеген картоп бүлінген.
Алайда аймақтың әлеуметтік-кәсіпкерлік корпорациясы қазір сөрелерде бүлінген картоп жоқ екенін айтты және желіде тараған видеоны ескі деді.
«ӘКК-Ақтөбе» мәліметтері бойынша қазір жергілікті коммуналдық шағын базарларға аптасына 40 тоннаға дейін картоп жеткізіледі. Алайда бұл жеткіліксіз: ақтөбеліктер 116 теңге тұратын картопты тез алып кетеді. Осыған байланысты сатуға шектеулер енгізу туралы шешім қабылданды.
«Әлеуметтік картоп «Табыс» шағын базарларында килограмына 116 теңге бағамен сатылады. Аптасына 35-40 тонна сатылады. Біз жалға алушылардан алыпсатарлықты болдырмау үшін картопты тек бөлшек саудада, шамамен 5-7 килограмм пакеттерде сатуды сұрадық. Себебі арзан картопты бірден бірнеше қаптан сатып алғысы келетіндер болды. Тек осыған байланысты шектеулер енгізілді», — деп түсіндірді «ӘКК-Ақтөбе» азық-түлікпен қамтамасыз ету департаменті директорының орынбасары.
Әлеуметтік картоп супермаркеттер желісінде де бірдей бағамен сатылады — килограмына 116 теңге. Картоптар кішкентай, бірақ халық оны сонда да жылдам алып кетіп жатыр.
Коммерциялық картоп бағасы килограмына 400-500 теңгеге жетеді. «ӘКК-Ақтөбе» мәліметтері бойынша облыста 1164 тонна картоп қоры бар, ал апта сайын әлеуметтік павильондар мен супермаркеттерге шамамен 100 тонна жеткізіледі.
