Мемлекет басшысы Қасым-Жомарт Тоқаев Ақмола, Ақтөбе, Қостанай және Солтүстік Қазақстан облыстарының әкімдерімен телефон арқылы сөйлесті. Аталған облыстардың әкімдері Президентке өңірлердегі ахуал жайында, табиғи апатпен күресу және су тасқынының зардаптарын жою үшін қабылданған шаралар жөнінде есеп берді.
Аймақ басшыларының айтуынша, жалпы жағдай жіті бақылауда, табиғи апатпен күресу үшін адам күші де, техника да жеткілікті. Президенттің тапсырмасымен Республикалық штабқа жетекшілік ететін Премьер-Министр Олжас Бектенов бастаған Үкімет мүшелері су тасқынынан зардап шеккен аймақтарға жіберілген болатын. Азаматтардың қауіпсіздігін қамтамасыз ету, олардың керек-жарағын шешу бағытында ауқымды жұмыс атқарылып жатыр. Президент Қасым-Жомарт Тоқаев облыстар мен қалалардың әкімдеріне аумақтарды абаттандыру, көгалдандыру жөнінде бірқатар тапсырма беріп, бұл жұмыстарға тұрғындар мен еріктілерді тұрақты түрде тарту маңызды екенін атап өтті. Президенттің айтуынша, елді мекендер мен қоғамдық демалыс орындарын күтіп-баптау әкімдер қызметін бағалаудың тағы бір өлшемі болмақ. Жалпы, өңір басшылары қалаларды лайықты және тартымды жағдайда ұстау мәдениетін енгізуі керек. Президент жүктеген тапсырмаға орай әр аймақ апаттың салдарын жою жұмысына жұртшылықты жұмылдыруда. Мәселен Ақмола облысының әкімі Марат Ахметжанов 20-ға жуық кәсіпорын облыс орталығында су тасқынын жоюға көмек көрсеткенін айтып, апатты ауыздықтауда өңір кәсіпкерлерге арқа сүйейтінін алға тартты. «Өздеріңіз білетіндей, еріген су ағынының ұлғаюына байланысты Қылшақты өзені жағадан асты. Оның айналасында бірталай тұрғын үй, әлеуметтік нысандар орналасқан. Апаттың алдын алуда көпшіліктің бірлігі аса маңызды. Сондықтан осындай жауапты сәтте халыққа жәрдем беру ісінен шет қалмай, азаматтық ұстанымды, елге деген жанашырлықты көрсететін кез келді. Бұл бәріміз үшін ортақ міндет, осы ретте ел қиындығынан табыс тауып, бизнес жасамауды сұраймын», – деді М.Ахметжанов. Сондай-ақ, өңір басшысы биыл Қылшақты өзенінің арнасын тереңдету және жағалауын нығайту бойынша ауқымды жұмыстар жоспарланғанын атап өтті. Бұл су тасқынының қайталану қаупін азайтады. «Табиғи апаттарды болжау мүмкін емес. Үйлерге су кіргізбеу үшін Сүлейменов көшесінен Ғабдуллин көшесіне дейінгі жағалау сызығын нығайтатын боламыз. Жұмыс екі ауысымда жүргізіледі», – деді «Қазавтожол» ЖШС директорының орынбасары Өмірбеков Арман. Бүгінгі таңда облыста су тасқынына қарсы іс-шараларға 1300-ден астам адам, 322 бірлік техника жұмылдырылған.
Майра ТОҚАНОВА, «Заң газеті» АҚМОЛА ОБЛЫСЫ
