Алматы қаласы Жастар саясаты басқармасының қолдауымен Алмалы ауданының комьюнити орталығында жастар арасында «Almaly night» интеллектуалды ойыны өтті.
Қала жастары арасында мемлекеттік тілдің мәртебесін көтеру, мемлекеттік тілге деген құрметін қалыптастыру, ақыл-ойын, жылдам ойлау қабілетін арттыру және жастардың бос уақытын тиімді пайдалану мақсатында өткізілген сайыста 9 команда бақ сынады.
Ұйымдастырушылардың айтуынша «Almaly night» жобасы дәстүрлі түрде әр апта сайын өтіп тұрады және ойынға қызығып, қатысуға өтініш білдіретін жастардың саны да аз емес.
— Бұл жай ғана басқосу емес, жастардың білімін шыңдап, таным-көкжиектерін кеңейту, жаңа идеялас достар табу мүмкіншілігі. Біз ойынды қызықту өткізу үшін, әр ойын сайын әртүрлі тақырыптар таңдаймыз. Бұл ойын біздің орталықта осымен 3 рет өтіп тұрғанымен, осы уақытқа дейін 200-ге жуық жастардың басын қосты, — деді Алмалы комьюнити орталығының жетекшісі Анарбаева Бағдат.
Нәтижесінде 9 команданың ішінен «West side» командасы топ жарса, екінші орынды «Qamqor MOK» командасы иеленді. Үшінші орын — «Екі жарым адам» командасының қанжығасында.
Ойын соңында жеңімпаздар арнайы диплом мен бағалы сыйлықтармен марапатталды.
