Ақтөбеде ҚАЖ департаментіне қарасты №70 (тергеу изоляторы) мекемесінің режим және күзет бөлімінің қызметкерлері мекемеге келген сәлемдемені тексеру кезінде донердің ішіне фольгаға мұқият жасырылған шағын телефонды сим картасымен бірге тәркіледі.
Мекемеге әкелуге тыйым салынған заттарды 34 жастағы қала тұрғыны А. Ж. есімді азамат абақтыда «Бопсалау» бабы бойынша айып тағылған күдікті-айыпталушы досына азық-түлікпен бірге донердің ішіне жасырып, бермек болған.
– Азамат А. Ж. өз түсініктемесінде кінәсін толық мойындады. Құқық бұзушыға ҚР ӘҚБтК-нің 481-бабы бойынша хаттама толтырылып, іс Ақтөбе қаласының мамандандырылған әкімшілік сотына жолданды, – дейді №70 мекемесінің бастығы әділет подполковнигі Аман Құлмұхамбетов.
Айта кету керек, аталған тергеу изоляторының режим және күзет бөлімінің қызметкерлерінің қырағылығымен мекемеге келген сәлемдемелерді тексеру барысында биылғы жыл басынан бері 19 телефон тәркіленген болса, өткен 2022 жылы 21 телефон тәркіленіп алынды.
Гүлфайруз Төремұратова,
Ақтөбе облысы бойынша ҚАЖ Департаментінің баспасөз хатшысы,
Фотолар мен видеоны Ақтөбе облысы бойынша ҚАЖ Департаментінің баспасөз қызметі ұсынды
