Ақтөбе облысы бойынша Қылмыстық- атқару жүйесі Департаментінің қызметкерлері отбасыларымен спорттық сайысқа түсті. ҚАЖ қызметкерлерінің отбасылары арасында «1 маусым — Халықаралық балалар күніне» орай ұйымдастырылған «Әкем, анам және мен» спорттық сайысы ата-ана мен баланың арасындағы қарым қатынасты нығайту, салауатты өмір салтын насихаттау, қызметкерлерді дене шынықтыру мен спортқа үгіттеу, сондай- ақ мереке қарсаңында балаларымен, отбасымен бірге уақыттарын қызықты әрі тиімді өткізуді мақсат етті.
7 кезеңнен құралған сайыста Ақтөбе облысының ҚАЖ Департаменті және Департаментке қарасты Ақтөбе қаласының Астана аудандық Пробация қызметі, Алматы аудандық Пробация қызметі, №70, №8, №9 мекемелерінен барлығы 6 команда өзара бақ сынасты. Бірінші кезеңде қызметкерлер өз отбасыларын таныстырса, келесі кезеңдерде қапшықпен жылдамдыққа секіру, математикалық есептер шығару, арқан тартысумен сайысты.
Қызықты да, тартысты өткен сайыста №8 түзеу мекемесі қызметкерлерінен құралған «Тапқырлар» командасы 1-ші орынды жеңіп алса, 2-орынды №9 қоныс колониясы қызметкерлерінен құралған «Жігер» командасы, ал 3-ші орынды Ақтөбе қаласы бойынша Алматы аудандық Пробация қызметі қызметкерлерінен құралған «Дружная семья» командасы қанжығасына байлады.
Сайыс қорытындысымен жеңімпаздар Ақтөбе облысы бойынша ҚАЖ Департаменті бастығының грамотасымен және бағалы сыйлықтармен марапатталды. Сондай-ақ ойынға қатысқан барлық балаларға ойын доптары таратылды. Сонымен қатар, ойынға қатысушыларды «1 маусым – Балаларды қорғау күнімен» құттықтаған Ақтөбе облысы бойынша ҚАЖ Департаментінің Ардагерлер кеңесінің төрағасы Сақыткерей Баймағамбетов барлық балаларға балмұздақтар сыйлап, қуантты.
