Әлеуметтік желіде жазғы демалыста оқушылар мен студенттер арнайы жұмыс істей алатыны жазылған. Бұл бастама арқылы 14 жастан асқан жасөспірімдер онлайн түрде түйіндеме жариялап, өздеріне сәйкес бос жұмыс орындарын өз бетінше іздей алады. Дегенмен осы сауалға орай халық арасында көптеген күдіктер туындап, сенімсіз пікірлер жазылып жатыр. Factcheck.kz бұл ақпаратты тексеріп көрді, — деп хабарлайды Massaget.kz тілшісі.
Enbek.kz сайтында расымен де «Менің жазғы каникулым» атты жаңа бөлім ашылғанын көруге болады. Сайттағы ақпаратқа қарасақ, 14 жасқа толған оқушылар оқудан бос уақытында жеңіл және қауіпсіз жұмыстарда, ал 15 жастан асқан оқушылар мен студенттер негізгі орта білімі болған жағдайда жұмысқа орналаса алатынына көз жеткізуге болады.
Платформаға енгізілген жаңа бөлім екі санатқа бөлінеді: жасөспірімдер мен студенттерге және жұмыс берушілерге. Сәйкесінше, жасөспірімдер мен студенттерге атты класын таңдап, қалаған жұмысына өтінім қалдыра алады. ҚР Еңбек Кодексінің, 31-бап, 2-тармағына сәйкес, 14 жасқа толған оқушылар оқудан бос уақытында жеңіл және қауіпсіз жұмыстарда, ал 15 жастан асқан оқушылар мен студенттер негізгі орта білімі болған жағдайда өз бетінше жұмыс істеуге құқылы. Алайда, 14 пен 15 жас аралығындағы балаларға ата-анасының көмегі міндетті түрде қажет. Ең алдымен, жұмысқа кірушінің ата-анасы Enbek.kz порталында баласы үшін жеке кабинет ашып, тіркелуден өтуі керек. Кейін, жасөспірімге кіру деректерін беріп, платформаны қолдануына ерік бере алады.
