Бұдан бірнеше ай бұрын алматылық Ермек фестивальдерге тек қонақ ретінде қатысатын. Ол әрдайым мерекенің қалай ұйымдастырылатынын, сахнаның артында кім жұмыс істейтінін, барлық үдерістердің қалай өтетінін білгісі келетін. Бүгінде ол қала іс-шараларының ұйымдастырушылары қатарында — әртістерді қарсы алады, еріктілерді бағыттайды және таймингті бақылайды.
Бұл жол Skill All жобасы ұсынған тегін event-менеджмент курсынан басталды. Жоба Алматы қаласы Жастар саясаты басқармасының қолдауымен жүзеге асырылады. Бұл бағдарлама Ермек үшін үлкен өзгерістердің бастамасы болды — ол өзі армандаған мамандыққа алғашқы қадамын жасады.
«Skill All мен үшін маңызды кезеңдердің бірі болды. Мен әрқашан event-саласында жұмыс істегім келетін, бірақ нақты неден бастау керек екенін білмедім. Ал бұл курстар — тамаша бастама болды: өз саласының керемет мамандары, тәжірибе және алға деген ұмтылыс сыйлайтын орта», — дейді Ермек.
Оқудан кейін ол бірнеше іс-шарада практикадан өтіп, өзін белсенді және жауапты ұйымдастырушы ретінде көрсетті. Қазір Ермек Алматыдағы ірі фестивальдердің дайындық жұмыстарына қатысып, event-индустрияда сенімді қадам жасап келеді.
Skill All жобасы Алматыда 23 маусымда бастау алды. Жобаның мақсаты — 16–35 жас аралығындағы жастарға тегін білім беріп, сұранысқа ие мамандықтарды меңгерту және жаңадан бастап мансап құруға мүмкіндік беру. Бес айда бағдарламаға 2000-нан астам жас қатысты. Курстар 2–5 аптаға созылады және IT, SMM, PR, EVENT, бариста, кондитерлік іс және басқа да бағыттарды қамтиды.
Skill All жобасы нақты тәжірибе мен жұмысқа орналастыру мүмкіндіктеріне басым назар аударады. Таңдалған біліктілікті бар болғаны бірнеше аптада аяқтауға болады, алайда Ермек сияқты жастар үшін бұл уақыт өмірді түбегейлі өзгертуге жеткілікті.
30 қарашада аяқталатын бұл жоба — мемлекеттік қолдаудың жастарға тек білім емес, қоғамда өз орнын табуға мүмкіндік беретінінің жарқын үлгісі.
