Көші-қон комитетінің төрағасы Әсет Шоновтың айтуынша, кейінгі екі жылда Қазақстанда көші-қон сальдосы оң көрсеткішті көрсетіп отыр, — деп хабарлайды Massaget.kz тілшісі.
Биылғы II тоқсанда көші-қон сальдосы +7,7 мың адам болған.
«Елге 11,3 мың адам келсе, 3,5 мың адам кеткен. Көші-қон өсімі негізінен ТМД елдері мен Қытайға тиесілі. Сонымен қатар, білікті кадрлардың кету үрдісі әлі де сақталып отыр. Қазақстан азаматтары негізінен Ресейге (8,7 мың адам), Германияға (2 мың адам) кетеді», – деді ол.
Дегенмен, министрлік мәліметінше, 2023 жылдан бастап шетелге жұмыс істеу мақсатында кететін Қазақстан азаматтарының саны төмендеген.
«Биылғы бірінші жартыжылдық бойынша шетелде жұмыс істеп жүрген Қазақстан Республикасының азаматтарының саны — 126 531 адам. Қазақстан азаматтарының басым бөлігі Ресей Федерациясында (102 460 адам), Корея Республикасында (15 790 адам), БАӘ-де (2 997 адам), Ұлыбританияда (1 912 адам) еңбек етіп жүр», — деді ведомство өкілі.