Университетке қадам басу – әрбір болашақ маман үшін жаңа мүмкіндіктер мен жауапкершіліктерге толы кезең. Өз жолымды таңдауда мен үшін ең маңыздысы – сапалы білім мен кәсіби орта болды. Осы орайда Әл-Фараби атындағы Қазақ ұлттық университетіне түсуім менің өмірімдегі үлкен әрі маңызды шешімдердің бірі болды. Колледждегі Құқықтану мамандығына негізделген білімім университет қабырғасында тереңдеп, нақты бағыт алуда. Қазақ Ұлттық Университетінің академиялық ортасы, тәжірибелі оқытушылары, студенттердің белсенділігі мен ғылыми атмосферасы маған кәсіби тұрғыдан өсудің мықты іргетасын қалыптастырды.
Заң факультеті – Қазақстандағы беделі жоғары құқықтық мектептердің бірі. Оның ішінде Қылмыстық құқық, қылмыстық іс жүргізу және криминалистика кафедрасының орны ерекше. Бұл кафедра тек теориялық білім беретін орын емес, нағыз кәсіби дағды қалыптастыратын орта деп айтар едім. Қылмыстық-құқықтық бағытты таңдаған студенттер үшін мұнда білім алу – үлкен артықшылық.
Қылмыстық құқық — қоғамды, азаматтардың құқықтары мен бостандықтарын қорғауға бағытталған құқық саласы. Әрбір дәрісте біз қылмыс құрамын анықтаудың ерекшеліктерін, саралау мәселелерін, жаза тағайындаудың қағидаларын талқылаймыз. Оқытушылардың тәжірибеге сүйене отырып мысал келтіруі пәнді тереңірек ұғынуға мүмкіндік береді. Бұл пән маған дәлдік, логикалық ойлау, Қылмыстық және қылмыстық іс жүргізу заңнамаларының нормаларын нақты талдау сияқты дағдылар берді деп айта аламын.
Қылмыстық іс жүргізу құқығы – әділ сот төрелігінің негізі. Тергеу сатылары, процессуалдық қатысушылардың мәртебесі, дәлелдемелерді жинау мен бағалау тәртібі – мұның бәрі заңгердің кәсіби деңгейін айқындайды. Практикалық сабақтар барысында біз шынайы істердің моделін жасап, әр кезеңді өзіміз орындап көреміз. Бұл маған құқықтық мәдениет, жауапкершілік және процессуалдық сауаттылықты қалыптастыруға көмектесті.
Криминалистика – ең қызықты және ең практикалық пәндердің бірі. Дәлелдемелерді табу, бекіту, зерттеу тәсілдері, оқиға орнын қарау алгоритмдері, дактилоскопия, трасология, баллистика сияқты салалар – болашақта тергеуші немесе криминалист-маман болуды көздеген студент үшін аса маңызды. Университет зертханасында алған тәжірибем менің аналитикалық ойлауым мен бақылау қабілетімді дамытты. Криминалистика адамды ұқыптылыққа, дәлдікке және логикалық байланыстарды табуға үйретеді.
Факультет өмірінің тағы бір ерекшелігі – ғылыми және қоғамдық іс-шаралардың көптігі. Конференциялар, пікірталастар, құқықтық клубтар – барлығы студенттің жан-жақты дамуына ықпал етеді. Колледжден кейін университеттің осындай қарқынды ортасына түсу менің кәсіби мотивациямды арттырды. Студенттердің белсенділігі, бәсекелестік орта, оқытушылардың, профессорлардың талапшылдығы мен қолдауы менің осы салада өсіп, өз білімімді ары қарай жетілдіруге ынталандырады.
Қазақ ұлттық университетінің Қылмыстық құқық, іс жүргізу және криминалистика кафедрасы – болашақ мамандарды дайындайтын мықты ғылыми мектеп. Бұл жерде тек білім ғана емес, құқықтық ойлау, жауапкежауапкежәне ең бастысы мінез қалыптасады. Алған білімімді болашақта еліміздің құқықтық жүйесін дамытуға, азаматтардың құқықтарын қорғауға бағыттағым келеді.
Қорытындылайтын болсам, университет өмірі – тек дәріс тыңдау емес, өзіңді тұлға ретінде қалыптастыру жолы. Қазақ ұлттық университетінде білім алу маған тек теориялық база емес, болашақ маман ретінде сенімділік, мақсаттылық және кәсіби бағыт берді. Бүгінде 2-курс студенті ретінде өз жолымды дұрыс таңдағанымды нық сеніммен айта аламын. Бұл факультет менің кәсіби болашағымның мықты қадамына айналды.
Әл-Фараби атындағы Қазақ ұлттық университеті, Заң факультеті
Авторы: з.ғ.к., профессор Мухамадиева Г.Н., 223-топ студенті Асанов М.Е.
