Қалалық Жалпыұлттық коалиция мүшелері — Бахтияр Камалов пен Досымбек Өтеғалиев — «Көк Төбе» демалыс саябағының ұжымымен кездесу өткізді. Кездесу барысында жаңартылған Конституция жобасының негізгі ережелерін жан-жақты түсіндіріп, оның елдің одан әрі дамуы мен мемлекеттік институттарды нығайтудағы стратегиялық маңызын атап өтті.
Сондай-ақ алда өтетін «Әділетті және Прогрессивті Қазақстанның Халықтық Конституциясы үшін» атты республикалық референдумға ерекше назар аударылды. Сөз сөйлегендер бұл бастама саяси жүйені жаңғырту мен мемлекеттіліктің берік негізі саналатын демократиялық қағидаттарды күшейту жолындағы маңызды қадам екенін жеткізді.
Баяндамашылардың айтуынша, ұсынылып отырған өзгерістер елдің құқықтық тұғырын бекемдеуге, қоғам мен билік арасындағы әділ тепе-теңдікті қалыптастыруға, мемлекеттік органдар қызметінің ашықтығын арттыруға және олардың азаматтар алдындағы жауапкершілігін күшейтуге бағытталған.
Кездесу ашық әрі мазмұнды пікір алмасу форматында өтті: ұжым мүшелері көкейлеріндегі сауалдарын қойып, оларға жан-жақты жауап алды.