Еліміздің көптеген өңірінде ауа райы ыстық әрі құрғақ болады, дегенмен астық шығатын өңірлерде, тау бөктерлері мен оңтүстіктің шеткері аймақтарында жауын-шашын көлемі климаттық нормаға жақын мөлшерде жауады. Бұл туралы Үкімет отырысында экология және табиғи ресурстар министрі Ерлан Нысанбаев мәлімдеді, — деп хабарлайды Massaget.kz тілшісі.
Құрғақшылық Қостанай, Батыс Қазақстан, Маңғыстау облыстарының оңтүстігінде, сондай-ақ, Алматы, Жамбыл, Қарағанды, Ақтөбе, Атырау, Абай және Түркістан облыстарының солтүстік аудандарында байқалуы мүмкін.
Жауын-шашын көбіне батыста және солтүстік-шығыста қалыпты шекте күтіледі, ал қалған аумақта көбіне нормадан аз болады, бұл құрғақшылық қаупін күшейтуі мүмкін.
Биылғы тамыз және қыркүйек айлары егін жинау жұмыстарына қолайлы болады. Экология және табиғи ресурстар министрінің мәліметінше, мол және ұзақ жауын-шашын жаумайды, ал еліміздің басым бөлігінде ауаның орташа температурасы климаттық нормадан 1 градусқа жоғары болады.
«Жаз айларының алдын ала болжамы нақтыланып, ай сайынғы болжамдармен толықтырылады, сондай-ақ, мүдделі мемлекеттік органдар мен халыққа жеткізіледі», — деп түсіндірді министр.
