Қазақтың мұзбалақ ақыны Мұқағали Мақатаевтың туған күніне орай облыстық Жастар ресустық орталығында қалалық орталықтандырылған кітапханалар жүйесіне қарасты №19 кітапхананың ұйымдастыруымен ақынды еске алуға арналған әдеби-сазды кеш өтті.
Жыр кешіне Сыр өңіріне белгілі ақындар мен белсенді жастар және Қылмыстық-атқару жүйесі департаментінің №37, №68 мекемесінің қызметкерлері де қатысты.
Кеште талантты жастар Мұқағали әлеміне тереңірек бойлап,оның сыршыл поэзиясы, пайымдауы өзгеден бөлек жебелі жырларынан жүректерге ерекше үнмен, соны серпінмен жеткізді.
Кеште ҚАЖ департаментінің №37 мекемесінің тәрбие бөлімінің қызметкері әділет аға лейтенанты Айнұр Абдрашитова ақын өлеңін жатқа оқыды.
— Поэзияның адам жанын жақсылыққа, ізгілікке, сұлулыққа тәрбиелейтін қасиеті бар. Біздің әрқайсымыз, мектеп қабырғасынан ақын өлеңдерімен сусындап өстік Ақын жырлары – әр адамға күш-қайрат, рух беретін өзгеше бір әлем. Өз басым солай түсінемін. Бүгінгі кештің өтуі шынымен мені қуантты. Кеште ақынның «Сәби ана» өлеңін оқып, кештен керемет әсер алдым»,- деді Айнұр Абдрашитова.
Кеш соңында ақынның сөзіне жазылған әндер де шырқалып, көрермендер бір мезет әуен құшағында тербелді.
