Ішкі істер министрінің цифрландыру жөніндегі орынбасары Сәкен Сәрсенов Солтүстік Қазақстан облысы бойынша қылмыстық-атқару жүйесі Департаментінің ведомстволық бағынысты мекемелеріне үздіксіз бейнебақылау жұмысымен, сондай-ақ адам мен багажды дербес тексеру үшін орнатылған рентген-телевизиялық жабдықтармен танысу мақсатында барды.
Бейнебақылау камераларын орнату, ең алдымен, бас бостандығынан айыру орындарындағы адамдардың құқықтарын, олардың қауіпсіздігін сақтауға және қорғауға, сондай-ақ сотталғандар тарапынан да, мекемелер әкімшілігі тарапынан да ықтимал құқық бұзушылықтардың алдын алуға бағытталған. Қазіргі уақытта Солтүстік Қазақстан облысы бойынша 5 мекеме жұмыс істейді (№48, №50, №51, №52, №66), онда 1500-ден астам үздіксіз бейнебақылау камералары орнатылған, бұл «соқыр аумақтардың» болуын толығымен алдын алады. Бейнебақылау сонымен қатар адамның жеке басын немесе көлігін анықтап қана қоймай, жасалған құқық бұзушылықты анықтауға мүмкіндік беретін жасанды интеллект жүйесіне ие.
«Рентгеноскопиялық сканер жүйесі киімнің астында, сондай-ақ адам денесінің ішінде немесе протездерде жасырылған барлық заттарды анықтайды. Барлық жасырын нысандардың сенімді табылуына кепілдік бере отырып, адамды толық көлемде тексеруді қамтамасыз етеді, соның ішінде аяқ киімді де»,- деп атап өтті №50 мекеме бастығы Қанат Сүлейменов.
Сапар барысында Сәкен Сәрсенов ішкі істер органдарының жұмысын цифрландырудың және мекемелерді үздіксіз бейнебақылаумен толық қамтамасыз етудің маңыздылығын атап өтті.
