Елімізде Тәуелсіздік алған мезеттен бастап жемқорлыққа қарсы қатаң мемлекеттік саясат қалыптасты. Еліміз ТМД мемлекеттерінің арасында бірінші болып 1998 жылы «Сыбайлас жемқорлыққа қарсы күрес туралы» арнайы заңын қабылдады. Кейіннен бұл саладағы ұлттық заңнаманы жетілдіру барысында Қазақстан Біріккен Ұлттар Ұйымының Сыбайлас жемқорлыққа қарсы, Трансұлттық ұйымдасқан қылмысқа қарсы конвенцияларын және басқа да жалпы жұрт таныған халықаралық актілерді ратификациялап, сыбайлас жемқорлыққа қарсы бүкіләлемдік қоғамдастықтың тең мүшесіне айналды.
Бұл проблемамен жан-жақты айналысып жүрген беделді халықаралық ұйым – Транспаренси Интернешнл қорының деректеріне сүйенсек, сыбайлас жемқорлыққа қарсы бүкіләлемдік кеңістіктегі Қазақстанның көрсеткіштері жыл сайын жоғарылап келеді. Демек еліміздегі сыбайлас жемқорлықпен күрес саясаты оң нәтижесін беріп келеді. Дегенмен уақыт ағымына сай жемқорлықпен күресті үнемі жетілдіріп отыру қажеттілігі сезіліп отыр. Сәйкесінше жемқорлықпен күрес саясаты да жетілдіріп келеді. Сыбайлас жемқорлыққа қарсы күрестің тиімділігін арттыру басты ұстаным болып отыр.
Сыбайлас жемқорлыққа қарсы тиімді күрес үшін халықтың құқықтық сауатсыздығын жоя отырып, түсіндіру жұмысының деңгейі мен сапасын арттыру маңызды. Халық өз құқықтарын, оларға қарсы қандай да бір құқыққа қайшы әрекеттер жасалған жағдайда оларды қолданудың нақты тәсілдерін толық білуі тиіс. Қазақстан Республикасының Сыбайлас жемқорлыққа қарсы саясатының негізгі міндеті сыбайлас жемқорлыққа төзбеушілікті қалыптастыру болып табылады. «Кішіден» «ұлыға» дейінгі бүкіл қоғамда «Нөлдік төзімділік» қағидатын қалыптастыру мемлекеттегі сыбайлас жемқорлықты жоюға ықпал етеді. Өз тарапынан мемлекеттік органдар мен лауазымды адамдар өз құзыреті шегінде сыбайлас жемқорлыққа қарсы күрес жүргізуге — ұйым қызметінде сыбайлас жемқорлықтың көріну фактілеріне жол бермеуге, «сыбайлас жемқорлыққа қарсы іс-қимыл туралы», «Мемлекеттік қызмет туралы», «Мемлекеттік қызметшілердің Әдеп кодексі»Заңдарының талаптарын мүлтіксіз сақтауға міндетті.
Сыбайлас жемқорлық – бұл індет,ол бір күнде шеше салатын шаруа емес. Бұл індетпен күрес тек мемлекет тарапынан емес, бүкіл ел болып жұмылғанда ғана жеңуге болатыны анық.
Сембаев Данияр Казалиевич, Алматы қаласы Әуезов аудандық сотының судьясы
