Оңтүстік астанадағы Орталық қалалық клиникалық аурухана дәрігерлері жүктіліктің 20-аптасында әйелдің жатыр түтікшесіндегі үлкен кистаны алып тастады. Ота міндетті әлеуметтік медициналық сақтандыру арқылы жасалды.
Клиника баспасөз қызметінің мәліметінше, 28 жастағы пациент ауруханаға «аналық безі кистасы» деген диагнозбен түскен. Соңғы кезде ісік қатты үлкейген, диаметрі 35 сантиметрге жетіп, көлемі 9 айлық жүктілікпен теңескен.
Гинекология бөлімшесі меңгерушісі Алмат Қоңырқұлжиновтың айтуынша, дәрігерлер мұндай үлкен кистаны бұрын-соңды кездестірмеген.
Тәжірибелі хирург мамандар ісік көлемі үлкен болғандықтан лапаротомиялық операция жасау туралы шешім қабылдады. Ота кезінде кистадан 10 литрге жуық сұйықтық алынған.
Міндетті әлеуметтік медициналық сақтандыру шеңберінде жасалған операция сәтті өтті. Дәрігерлер әйелдің репродуктивтік органдарын ғана емес, іштегі нәрестені де сақтап қалды. Қазір олардың өміріне төнген қауіп толығымен сейілді, дейді дәрігер.
ZANMEDIA.KZ – Қоғамдық-саяси, құқықтық сайт. Заң газетінің бас редакторы: Айнұр Сембаева Тел.: +7 701 122 0940 Бас редактор: Қ.Ермекова Тел: +7 777 407 5511 Мекен-жай: Алматы қ., Досмұхамбетов 68 Б. Жарнама беру үшін: 8 708 929 98 74 +7 701 276 8989 E-mail: zanreklama@mail.ru.
© Меншік иесі: "ЗАҢ" Медиа-корпорациясы" ЖШС
