Қазіргі таңда азаматтардың шетелде білім алуы, жұмысқа орналасуы немесе тұрақты тұруға шығуы жиілеп, ресми құжаттарды заңдастыру мәселесінің өзектілігі артып отыр. Осы бағытта апостиль қоюға байланысты мемлекеттік қызметтердің сапасы мен заңдылығына қатысты даулар әкімшілік соттардың қарауына жиі түсуде.
Апостиль рәсімдеу мәселелері бойынша сотқа жүгінулер көбіне келесі жағдайларға байланысты болады: мемлекеттік органның апостиль қоюдан бас тартуы, құжаттарды қарау мерзімдерінің бұзылуы, толық емес немесе негізсіз талаптардың қойылуы, мемлекеттік қызмет көрсету тәртібінің сақталмауы.
Мұндай істерді қарау барысында сот мемлекеттік органның әрекеті немесе әрекетсіздігі заң талаптарына сәйкестігін жан-жақты тексереді.
Қызылорда облысының мамандандырылған ауданаралық әкімшілік соты тәжірибесінде азаматтардың құқықтарын қорғау басымдыққа ие. Істі қарау кезінде: мемлекеттік қызмет стандарттарының сақталуы, өтініш берушінің құжаттарының толықтығы, бас тартудың заңды негіздерінің болуы, процестік мерзімдердің орындалуы назарға алынады.
Егер мемлекеттік органның шешімі негізсіз деп танылса, сот апостиль қою жөніндегі міндетті жүктеу немесе қызметті қайта қарау туралы шешім қабылдауы мүмкін.
Сот тәжірибесі көрсеткендей, әкімшілік әділет институты мемлекеттік қызмет көрсету сапасын арттыруға ықпал етеді. Азаматтар өз құқықтары бұзылған жағдайда сот арқылы: заңсыз бас тартуды жоюға, қызмет көрсету мерзімін сақтатуға, мемлекеттік органды нақты әрекет жасауға міндеттеуге мүмкіндік алады.
Апостиль рәсімдеу мәселелері бойынша туындайтын дауларды әділ қарау — азаматтардың халықаралық құқықтық қатынастарға еркін қатысуының маңызды кепілі. Әкімшілік соттар мемлекеттік органдар қызметінің заңдылығын қамтамасыз етіп, құқық үстемдігін нығайтуға және азаматтардың мемлекетке деген сенімін арттыруға өз үлесін қосып келеді.
Қызылорда облысының мамандандырылған
ауданаралық әкімшілік сотының бас маманы А. Өмірзақ
