Алматы жастары үшін жұмысшы мамандықтар туралы қысқаметражды фильмдер түсірілді
Алматыда Жастар саясаты басқармасы мен қала әкімдігінің жобалық кеңсесінің қолдауымен «One day life» қысқаметражды фильмдер сериясының премьерасы өтті. Жоба Жұмысшы мамандықтар жылы аясында қолға алынған.
Қысқаметражды фильмдер еңбегі мен табандылығы арқылы өмірдің қиындығын жеңіп, жетістікке жеткен адамдардың шынайы оқиғаларын баяндайды.
«One day life» жобасы жұмысшы мамандықтарын насихаттауға және түрлі саладағы еңбектің маңыздылығын көрсетуге арналған.
«Бұл жоба креативті әрі мақсатшыл жастар үшін жаңа шабыттың символына айналары сөзсіз. Осындай бастамалар арқылы біз маңызды әлеуметтік мәселелерді көтеріп қана қоймай, әркім өзін көрсете алатын шығармашылық орта қалыптастырамыз», – деді ұйымдастырушылар.
Премьераға жастар, білім беру мекемелерінің өкілдері және жастар ұйымдары қатысты.
«One day life» жобасының әрбір қысқаметражды фильмі құрылысшылар мен медбикелерден бастап, аспаздар мен инженерлерге дейінгі әртүрлі жұмысшы мамандық иелерінің бір күндік өмірін көрсетеді. Көрермендер кейіпкерлердің кәсіби өмірін ғана емес, олардың еңбегінің қоғамға тигізетін әсерін де көреді.
Жоба авторлары оқиғаларды баяндап қана қоймай, еңбекке деген құрметтің маңыздылығын және қоғамның дамуындағы жұмысшы мамандықтарының рөлін көрсетуді мақсат тұтқан.
