Ішкі істер министрі Ерлан Тұрғымбаев ТЖ режимі кезінде құқықтық тәртіпті қамтамасыз етуге тартылған қызметкерлерге 150 мың теңге көлемінде сыйақы бөлінгенін айтты, — деп хабарлайды Tengrinews.kz тілшісі.
«Әлеуметтік-экономикалық жағдайды тұрақтандыру жоспарына сәйкес, Ішкі істер министрлігі үш шара бойынша негізгі орындаушы саналады. Біріншісі — жауынгерлік әзірлік пен техниканы арттыру, әскери қызметкерлер рухын көтеру шараларын қабылдау. Ең алдымен, арнайы жасақтардың материалдық-техникалық базасын нығайту көзделген. Жалпы, үкіметтік резервтен материалдық-техникалық базаны нығайтуға қаражат бөлінді», — деді министр үкімет отырысында.
Тұрғымбаевтың айтуынша, жеке құрамның рухани-адамгершілік рухын сақтау мақсатында қызметкерлер бойында отансүйгіштік пен борышқа адалдық сезімін ояту шаралары жүргізіліп жатыр. Сондай-ақ, қызметкерлер жұмысын бағалап, ынталандыру шаралары жүргізіледі.
«Мәселен, төтенше жағдай кезінде құқық қорғау қызметіне тартылған қызметкерлерге 150 000 теңге көлемінде сыйақы және курсанттар мен сарбаздарға бағалы сыйлықтар бөлінді», — деп қосты Тұрғымбаев.