Тараз өңірлік университетінен 300-ден астам студент пен магистрант оқудан шығарылды. Бұған жалған құжаттардың тапсырылуы себеп болған, деп хабарлайды Stan.kz ақпарат агенттігі.
Білім алушылардың көпшілігі өз уақытында ҰБТ-да қажетті балл жинай алмағаны белгілі болды. Дегенмен олар тығырықтан шығудың ерекше жолын тапқан: шетелдік университеттерде бір семестр оқығаны туралы сертификаттар берді. Осылайша, олар оқу орнын «ауыстырған».
Қазір Жамбыл облысы бойынша сыбайлас жемқорлыққа қарсы іс-қимыл департаменті шетелдік университеттердің мөрлері мен қолдарының жаппай бұрмалануын тексеріп жатыр. Мұндай фактілер елдің басқа университеттерінде де болуы мүмкін.
«Биылғы оқу жылында бізге 400-ден астам студент пен магистрант ауысуға ниет білдірді. Біз бұл құжаттардың түпнұсқалығын тексердік. Олардың көпшілігі бойынша шетелдік білім беру ұйымдарында оқу фактілері расталмады. Бізге ауысуға ниет білдірген адамдардың 75%-дан астамын біз оқудан шығардық немесе оқуға қабылдамадық», — деді М. Х. Дулати атындағы Тараз өңірлік университетінің басқарма төрағасы Ержан Әмірбекұлы.