Кеше Алматыдағы ең танымал мейрамханалардың бірінде танымал блогер, психолог, кәсіпкер Балхия Балтабайдың тойы дүрілдеп өтті. Соңғы жылдары қазақ қыздарына ислами психология тақырыбында тренингтер өткізіп, халық көңілінен шыға білген блогердің таңдауы Мұрат Анарбек есімді жігітке түсіпті. Он екі жыл бұрын сезімін білдірген жігіттің ұсынысын енді қабыл алған Балхия Балтабай ханым әлеуметтік желідегі парақшасында тойдың ерекше өтетінін алдын ала айтқан болатын.
Расында да, той қонақтарына тост берілмей тек ойын ойнатылып, қонақтарды билетіп, эстрада жұлдыздарының ән шашуымен өткен тойдың шоу түрінде айрықша өткені байқалады. Тоқтар мен Бейбіт, Қуандық Рахым, Бүркіт пен Аиша, жастардың сүйікті тобы Калифорния секілді эстрада жұлдыздары да тойда өнгер көрсетті. Той тізгінін белгілі асаба Ерлан Құлшынбаев қолға алып, той көрігін қыздыра түсті.
Атап өтер жайт осы уақытқа дейін қайырымдылық істерімен жиі айналысатын блогер халықтың да сүйіктісіне айналғаны соншалық жас жұбайлардың тойына еліміздің түкпір түкпіріндегі халық қызығушылық танытқан. Сондықтан жас жұбайлардың тойын алыстан болса да тамашалауға тырысып тікелей эфирді ақылы көруге тырысқан, сүйікті қыздарының тойына шашу шашқан халық та көп болған. Алайда блогер тойға түскен қаржыны түгелімен Түркістан облысының Арыс қаласында салынып жатқан мешіттің құрылысына аударуды шешкен.
Сондай-ақ жас жұбайлар тойда ата-аналарына, бірнеше той қонақтарына Ұмраға қажылыққа жолдама сыйлады. Белсенді той қонақтарына ақша мен алтын таратқан жас жұбайлардың той қонақтарының көңілін барынша тапқысы келгенін байқауға болады.
Жаңаша форматта, сауапты амалдары молынан, ерекше өткен тойды әлеуметтік желілер де көп талқылауда.
