Алматы және Жетісу облыстары бойынша ҚАЖ департаментіне қарасты №12 мекемеде тыйым салынған заттарды алып кіру әрекетінің жолы кесілді. Көлік құралын тексеру барысында кабина төбесінің қаптамасы астынан ұялы телефондар мен басқа да тыйым салынған заттар анықталды.
Жасырылған заттарды мекеменің жедел және режим бөлімдерінің қызметкерлері Ұлттық ұланның 3660 әскери бөлімінің әскери қызметшілерімен бірлесіп жүргізген тексеру кезінде тапты.
Нәтижесінде әртүрлі маркадағы 10 ұялы телефон, 42 SIM-карта және төрт жад картасы тәркіленді.
Аталған дерек бойынша Алатау ауданының полиция басқармасының жедел-тергеу тобы шақырылды. Процестік шешім қабылдау үшін материалдар сотқа жолдауға дайындалды.
ҚАЖ департаменті мекемелерге тыйым салынған заттардың жеткізілуіне жол бермеу және белгіленген режим талаптарын сақтау бағытындағы жұмысты жалғастыруда.
