Премьер-министр орынбасары Ералы Тоғжановтың төрағалығымен ВАК отырысы өтті. Отырыста мектеп оқушыларының оқуына бірнеше шешім шығарылды, — деп хабарлайды Tengrinews.kz тілшісі Primeminister сайтына сілтеме жасай отырып.
Денсаулық сақтау министрі Ажар Ғиният кейінгі аптада эпидемиологиялық ахуал орташа есеппен 5,6 есе нашарлап кеткенін айтты. Ауру жұқтырғандар Қарағанды облысында 28 есе, Алматы облысында 11 есе, Атырау, Ақмола облыстарында және Алматы қаласында 9-9,5 есе артты.
ВАК талқылауының қорытындысы бойынша оқытудың штаттық форматына рұқсат беру ұсынылды:
- мектепке дейінгі ұйымдарда — ата-аналардың өтініштері бойынша («қызыл», «сары», «жасыл» аймақтарда);
- оқушы саны 600-ге дейін (қоса алғанда) жалпы білім беретін мектептерде;
- оқушы саны 600-ден асатын жалпы білім беретін мектептерде — жобалық қуаттың 50 пайызынан аспайтын жүктемемен;
- жалпы білім беретін мектептерде — бастауыш 1-4 сыныптар (халықаралық мектептерде 5-6 сыныптарды қоса алғанда);
- мектептен тыс ұйымдарда — жеке сабақтар, топтық сабақтар — 15 адамға дейін, мүмкіндігі шектеулі балаларға арналған түзету кабинеттерінде (орталықтарында), ересектерде – жеке және топтық сабақтар — 8 адамға дейін;
- колледждер мен жоғары оқу орындарында — аралас форматта: практикалық, зертханалық, семинарлық сабақтар, өндірістік практика — икемді график бойынша штаттық режимде, дәрістер — онлайн.
Орта білім беру ұйымдарында, колледждерде, жоғары оқу орындарында білім алушыларды қашықтан оқыту форматына ауыстыру карантин режимін бұзатын жайттар анықталған кезде қолданылады.
Кеңес соңында Ералы Тоғжанов мемлекеттік органдар мен әкімдіктердің басшыларына коронавирус инфекциясының таралуына жол бермеу бойынша Үкімет қабылдап жатқан шаралардың сақталуын бақылауды қамтамасыз ету жөнінде нақты тапсырмалар берді.
