«Қазақстан темір жолы» ҰК» АҚ пойыздардағы жоғарғы және төменгі орындарға әртүрлі тарифтер енгізу туралы шешімін өзгертті. Бұл туралы компанияның баспасөз қызметі мәлімдеді, — деп хабарлайды Tengrinews.kz тілшісі.
«Жолаушылар тасымалы» АҚ бес коммерциялық пойыздың жоғарғы және төменгі орындарына жол жүру құнына сараланған тәсіл қолдану бойынша пилоттық жобаны жойды», — деп хабарлайды»Қазақстан темір жолы» ҰК» АҚ баспасөз қызметі.
Еске салайық, «Қазақстан темір жолы» ұлттық компаниясының баспасөз қызметі Қазақстанда 1 желтоқсаннан бастап кейбір коммерциялық пойыздардың төменгі орны 20 пайызға қымбаттайтынын мәлімдеген болатын.
«»Жолаушылар тасымалы» АҚ 2023 жылдың 1 желтоқсанынан 28 ақпанына дейін пилоттық режимде коммерциялық пойыздардағы жоғарғы және төменгі орындарға жол жүру ақысына аталмыш тәсілді енгізеді. Жоғарғы және төменгі орындар арасындағы жолақы айырмашылығы 20 пайыз», — делінген хабарламада.
Компания билет бағасын осылай өзгерту арқылы орындарды біркелкі бөлу және жолаушылардың төменгі орындарға сұранысын қанағаттандыруға болатынын түсіндірді.
